भांगरभूंय | प्रतिनिधी
म्हापशें, प्रतिनिधी ः गिरीं ग्रीन पार्क जंक्शन उड्डाण पुलाचेर चलते मोटारीक उजो लागलो. हांतूत मोटारीचे व्हड प्रमाणात लुकसाण जाले. शेनवारा दनपारां सुमार 2.30 वरांचेर ही घडणूक घडली. ड्रायव्हर महादेव मोरजकार (सांगोल्डा) जीए 03 व्हाय 3811 ह्या मारुती ओमनी गाडयेंतल्यान गिरी सावन तार बस्तोडा वयल्यान म्हापशें बाजारा वटेन येतालो.
हायवेचेर ग्रीन पार्क उड्डाण पुलाचेर गाडी पावतकच इंजिनांत शॉर्ट सर्किट जावन उजो लागलो. मोरजकार हाका हें कळ्ळे बरोबर ताणें रोखडीच त्या जाग्यार गाडी उबी करून तो गाडयेंतल्यान देंवलो. उपरांत ताणें हे घडणुकीची म्हायती उजो पालोवपी दळाक दिली.
म्हापशें उजो पालोवपी दळाचे उपअधिकारी ज्ञानेश्वर पार्सेकार हांच्या फुडारपणा खाला स्वप्नेश कळंगुटकार, प्रवीण गांवकर, संजू कोरगांवकार आनी सनील बाणावलीकार हांणी घडणूक सुवातेर वचून उजो पालयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.