भांगरभूंय | प्रतिनिधी
कोरगांव, बातमीदार ः सध्या उश्णताय बरींच वाडत आसा तशेंच दिसभर वत आनी ते खातीर गर्मी व्हड प्रमाणांत वाडल्या. एके वटेन ही गर्मी आनी दुसरें वटेन परत परत लायट वचपाचे प्रकार चालूच आसता. देखून लोक खूब तिडकल्यात. कार्यालयांत फोन केल्ल्यार फोन सदांच व्यस्त आशिल्ल्याची जाप मेळटा. सध्या वीज खंडीत करपाचें प्रकार सुरू आसा. पेडणें तालुक्यांत मध्यान रातीं तशेंच दिसांतल्यान 20 तें 30 फावट लायट येता- वता. हाका लागून लोक बेजारल्यांत. सकाळच्या वेळार लोकांक जेवण करून वेळार कामार वच्चें पडटा अश्या वेळार लायट आसना. कार्यालयांत फोन केल्यार झाड पडलां, काम सुरू आसा अशीं कारणां दितात. पूण सध्या पावस वा वारो ना जाल्यार झाडां पडतात कशीं, असो प्रस्न उप्रासता. पावस येता तेन्ना रस्त्यार आयिल्लीं झाडां कापपाचें काम चालू करतात. ताचें आदीं हाचे कडेन आडनदर करतात.
सर्वसामान्य लोकां कडेन इन्व्हर्टर नाशिल्यान त्या लोकांक लायटीचेर आदारून रावचें पडटा. मात जें सरकारी अधिकारी आपल्या घरांत इन्व्हर्टर लावन घरा बसतात ते आतां लायट येतली वा अर्दे वरांन येतली अशें सांगतात. पूण अश्या परिस्थितींत लोकांनी करप कितें असो प्रस्न उप्रासला.
गांवांत लायट सारकी आसना. पूण बिलां मात वेळार भरचीं पडटा. ना तर नोटिसी धाडटात. कार्यालयांत वचून विचारल्यार एकामेकांचेर धुकलतात. “हांव न्ही तो” अशें सांगतात. सरकारान ह्या विशयाचेर लक्ष घालून ही समस्या सुटावी करची अशीं मागणी लोकांनी केल्या. लोकांनी कितलें म्हूण पाशियस काडचें असो प्रस्न लोक विचारतात. हालीं मुख्यमंत्री डॉ. प्रमोद सावंत मोरजे कार्यावळीक आयिल्ले तेन्ना लायट गेल्ली. तशेंच मंत्री तुमच्या दारी ह्या कार्यावळी वेळार हरमल वाठारांत लायट गेल्ली. कितल्योय कागाळी करून लेगीत अजून लायटीचो आपालिपा चालूच आसा असो आरोप लोकांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
