भांगरभूंय | प्रतिनिधी
तुलिओ डिसोझा : सरकारा आड न्यायालयांत वतले
म्हापशें: मांडवी न्हंये वयलो अटल सेतू पूल हें भाजपा राजवटींतलें भ्रश्टाचाराचें प्रतीक. ताका लागून तो सेगीत दुरुस्त करचो पडटा. ह्या भ्रश्टाचारांत पणजी स्मार्ट सिटीची भर नाका. स्मार्ट सिटी आनी अटल सेतूच्या कामांची सरकारान ताकतिकेन श्वेतपत्रिका जाहीर करची. तशेंच वेळ पडल्यार ह्या भ्रश्टाचारा आड न्यायालयांत काँग्रेस पक्ष वतलो अशी शिटकावणी काँग्रेसीचे म्हणयारे तुलिओ डिसोझा हांणी सरकाराक दिली.
मंगळारा म्हापशेंच्या जिल्हो काँग्रेस कचेरेंत आयोजीत केल्ले पत्रकार परिशदेंत ते उलयताले. ह्या वेळार उपाध्यक्षा डॉ. प्रमोद साळगांवकर, सरचिटणीस वरद म्हाड्डोळकार जिल्हो अध्यक्ष विरेंद्र शिरोडकार, साळगांव गटाध्यक्ष अतूल नायक, कळंगूट गटाध्यक्ष लॉरेन्स सिल्वा आनी हेर पदाधिकारी हाजीर आशिल्ले.
अटल सेतू पूल बांदून पांच वर्सां लेगीत जावंक नात. जाल्यार ह्या पुलार फोंडकुलां पडल्यांत. सेगीत पूल बंद दवरून दुरुस्तीचें काम हातांत घेवचें पडटा. हातूंतल्यान भ्रश्टाचार कितलो पातळ्ळा हें दिसून येता. भाजप सरकारांतल्या भ्रश्टाचाराचें हें एक प्रतीक आसा असो आरोप डिसोझान केलो.
पणजी स्मार्ट सिटीचें काम लेगीत ह्याच भ्रश्टाचाराच्या मार्गान चल्लां. भाजपा सरकारांतले आमदारूच ह्या स्मार्ट सिटीच्या कामा विशीं अधिकाऱ्यांक जापसालदार धरतात. जाल्यार मुख्यमंत्री ताचेर कांयच उलयनात अशें डिसोझान म्हणलें.
सरकारान स्मार्ट सिटीच्या नांवान लोकांचो मानसीक छळ चलयला. पणजी शारांतलीं फोंडकुलां आनी धुल्लान माखिल्ल्या रस्त्यांक लागूून लोकांक त्रास जायत आसा. सरकारान स्मार्ट सिटीच्या कामाचो आराखडो लोकां मुखार दवरचो अशी मागणी डिसोझान केली.
डॉ. प्रमोद साळगांवकार हांणी म्हणलें, ह्या सरकाराक बायलां विशीं आदर ना. गोंयांत बायलांक सद्या व्हड प्रमाणांत हिंसेक सामकार वचचें पडटा. तरी लेगीत राज्यांतलो महिला आयोग सक्रीय ना. आयोगा सामकार खूबशे खटले प्रलंबीत आसात. अशा वेळार सरकारान आयोगाच्या माध्यमांतल्यान बायलांक न्याय मेळोवन दिवपाचो यत्न करचो अशी मागणी तांणी केली.
भाजप सरकार हें सत्तेचो गैरवापर करून काँग्रेस फुडारी राहूल गांधी हांकां लक्ष्य करीत आसात. जे कोण सरकाराच्यो चुकी दाखयतात वा टिका करतात, तांचो आवाज बंद करपाचो यत्न देशभर सद्या सुरू आसा. हो लोकशायेचेर तशेंच संविधानाचेर आघात आसा. गोंयांतूय सरकारा कडल्यान फक्त इव्हेंट मॅनेजमेंटाच्या नांवा खाला भ्रश्टाचाराचे सुवाळे सुरू आसात असो आरोप तुलिओ डिसोझान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
