भांगरभूंय | प्रतिनिधी
उच्चाधिकार समितीचे बसकेंत जालो निर्णय
एका वर्सांत प्रकल्प; कामाची निविदा बेगिनूच
पणजी : सोनसड्या वेल्या कोयराचो प्रस्न सुटावो जावन कायमस्वरुपी उपाय काडपा खातीर सोनसड्यार 15 टीपीडी कोयर प्रकल्प स्थापन करपाचो निर्णय जाला. हो प्रकल्प एका वर्सांत स्थापन जातलो. मुख्यमंत्री डॉ. प्रमोद सावंत हांणी बसके उपरांत ही म्हायती दिली.
सोनसड्या वेल्या कोयराचो प्रस्न सुटावो जावपा खातीर खंडपिठाच्या आदेशा प्रमाण उच्चाधिकार समिती स्थापन जाल्या. हे समितीची बसका मुख्यमंत्री डॉ. प्रमोद सावंत हांच्या फुडारपणा खाला सोमारा जाली. हे बसकेक नगर नियोजन मंत्री विश्वजीत राणे, आमदार विजय सरदेसाय, आमदार आलेक्स रेजिनाल्ड आनी अधिकारी हाजीर आशिल्ले.
दोन वर्सां उपरांत उच्चाधिकारी समितीची बसका जाली. मडगांव आनी हेर लागसारच्या वाठारांतलो कोयर सोनसडो हांगा सांठो करून दवरतात. मडगांव आनी लागींच्या वाठारांतलो मेळून दिसाक सरासरी 50 टन कोयर तयार जाता. ह्या 50 टना मदलो 35 टन कोयर हो आेलो जाल्यार 15 टन कोयर सुको आसता. ह्या कोयराचो विलो लावपा खातीर सोनसड्यार 15 टीपीडी प्रक्रिया प्रकल्पाची उबारणी जातली.
म्हयन्या भरांत निविदा जारी जावन वर्सभरांत प्रकल्प पुराय जातलो. टीपीडी प्रकल्पा खातीर मडगांव नगरपालिका निधीची वेवस्था करतली. प्रदुशण नियंत्रण मंडळाच्या देखरेखी खाला प्रकल्प पुराय जातलो. कोयर वेवस्थापन म्हामंडळाच्या तंत्रीक सल्ल्या प्रमाण प्रकल्पाची उबारणी जातली, अशें मुख्यमंत्री डॉ. प्रमोद सावंत हांणी सांगलें.
सध्या दिसाक सोनसड्या वेलो 10 टन कोयर प्रक्रिये खातीर साळगांव प्रकल्पांत व्हरतात. सोनसड्या वेलो टीपीडी प्रकल्प पुराय जाले उपरांत साळगांवां कोयर व्हरचो पडचो ना.
शेड, रस्त्याची कामां 30 जून
मेरेन पुराय करप बंधनकारक
सोनसड्या वेल्या कोयराचो विशय मुंबय उच्च न्यायालयाच्या गोंय खंडपिठा प्रमाण हाताळचो पडटा. लीचेट टांकी, शेडीचें बांदकाम, रस्तो, राखणे वणत उबारून पावसांत कोयराची जतनाय घेवची पडटा. हीं सगलीं कामां 30 जून मेरेन पुराय करप बंधनकारक आसा. सगलीं कामां 30 जून मेरेन पुराय जातलीं अशी हमी मुख्यमंत्री डॉ. प्रमोद सावंत हांणी दिली.
कामाच्या नियाळा खातीर नेमान बसका
उच्चाधिकार समितीच्यो नेमान बसका जावपाची गरज असली. तरी फाटलीं दोन वर्सां समितीची बसकाच जावंक ना. हे मुखार उच्चाधिकार समितीच्यो नेमान बसका जातल्यो, अशें नगर नियोजन खात्याचे मंत्री विश्वजीत राणे हांणी सांगलें.
सरकार कामा विशीं गंभीर ना : विजय सरदेसाय
उच्चाधिकार समितीच्यो बसका थारावीक काळांत जावप गरजेचें आसा. ही बसका दोन वर्सांनी जाल्या. सरकार सोनसडो विशयाचेर गंभीर ना, हे सिद्द जाता, अशें विजय सरदेसाय हांणी बसके उपरांत सांगलें. कोयराचो प्रस्न सुटावो जावपा खातीर टीपीडी प्रकल्प बेगिनात बेगीन पुराय जावप गरजेचें आसा अशें आमदार विजय सरदेसाय हांणी सांगलें.
प्रकल्प जाले उपरांत हांव समाधानी : रेजिनाल्ड
उच्चाधिकार समितीची 2 वर्सां उपरांत बसका जाता. बसका जाली म्हूण हांव समाधानी ना. प्रकल्प पुराय जावन कोयराचो प्रस्न सुटावो जालो काय हांव समाधानी जातलों. सोनसड्या वेल्या कोयराचो त्रास कुडटरीच्या लोकांक जाता. बऱ्याच वर्सांची ही समस्या आसा, अशें रेजिनाल्ड हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
