सेड्रीक फर्नांडीसा आड पांचवो गुन्यांव दाखल

भांगरभूंय | प्रतिनिधी

जमीन हडप प्रकरण

पणजी: हणजूण, बार्देसांतली सर्वे क्रमांक 356/5 मदली जमीन हडप केल्ल्या प्रकरणांत विशेश तपास पंगडान (एसआयटी) सेड्रीक फर्नांडीस हाचे आड पांचवो गुन्यांव दाखल केला. ह्या प्रकरणांत अ‍ॅटोनेट उर्फ अँटोनिटा फर्नांडीस, मारिया अँजेला उर्फ अँजेलिका फर्नांडीस, रिटा फर्नांडीस आनी हेर दुबावितांचो आस्पाव आसा.

ह्या प्रकरणांत फ्रान्सीस डिसोझा हांणी आयोगा मुखार कागाळ दाखल केल्ली. आयोगान संबंदीत कागाळ एसआयटी कडेन वर्ग केली. ते प्रमाण कागाळदार डिसाेझा हांची हणजूण्यां सर्वे क्रमांक 356/5 मदली 2,925 चौखण मिटर जमीन पुर्वजांची आसा.

दुबावीत सेड्रीक फर्नांडीस, मारिया अँजेला उर्फ अँजेलिका फर्नांडीस आनी रिटा फर्नांडीस हांणी 5 जुलय 1951 दिसाचें विक्री पत्र तयार करून पुराभिलेख आनी पुरातत्व खात्यांत 4 फेब्रुवारी 2004 दिसा कम्प्युटरायझ दस्तावेज तयार केला.

उपरांत 13 जानेवारी 2021 दिसा कागाळदाराचे पूर्वज विन्सेंट फर्नांडीस हांच्या नांवाचो वापर करून उत्तराधिकारी म्हूण दस्तावेज तयार करून संबंदीत जमीन उपरांत रिटा फर्नांडीस हिका विक्री केल्ल्याचें दाखयिल्ल्याची म्हायती कागाळेंत दिल्या.

मजगतीं, विन्सेंट हाका 4 नोव्हेंबर 1979 दिसा मरण आयलें. जाल्यार ताची घरकान्न आयडीन्हा हिका 13 जानेवारी 2009 दिसा मरण आयलें. तांचे फाटल्यान उत्तराधिकारी म्हूण दोन धुवोच आशिल्ल्यो. तातूंतली एक धूव आंतोनिता फर्नांडीस हिका 5 नोव्हेंबर 1995 दिसा मरण आयलें, जाल्यार दुसरी धूव कागाळदार फ्रान्सीस डिसोझा हांची घरकान्न आशिल्ल्याची म्हायती कागाळींत नमूद केल्या.

ते प्रमाण एसआयटीन हाची दखल घेवन एसआयटीचे अधिक्षक निधीन वाल्सन आनी उपअधिक्षक शिवराम वायंगणकार हांच्या मार्गदर्शना खाला निरिक्षक सखाराम परब हांणी दुबावीत सेड्रीक फर्नांडीस, मारिया अँजेला उर्फ अँजेलिका फर्नांडीस, रिटा फर्नांडीस आनी दुबावितां आड भारतीय दंड संहितेच्या कलम 465, 467, 468, 471, 420 आनी आरडब्ल्यू 120 बी खाला गुन्यांव दाखल करून तपास सुरू केला.

जमीन हडप प्रकरणांत दुबावीत सेड्रीक फर्नांडीस, मारिया अँजेला उर्फ अँजेलिका फर्नांडीस हांचे आड हो पांचवो गुन्यांव आसा. जाल्यार दुबावीत रिटा फर्नांडीस हिचे आड तिसरो गुन्यांव दाखल केला. एसआयटीन जमीन हडप प्रकरणांत आतां मेरेन 48 गुन्यांव दाखल केल्यात.