भांगरभूंय | प्रतिनिधी
म्हापशें: मयत सॅम्युअल ब्रागांझा हाका न्याय मेळचो, हे खातीर म्हापशें चर्च ते पुलीस स्टेशना मेरेन कुटुंब तशेंच थळाव्यांनी मूक मेणवात फेरी काडली. सॅम्युअलाच्या मरणाक कारण थारिल्ल्यांचेर कारवाय करची हे मागणे खातीर भावूक वातावरणांत व्हड संख्येन तरणाटे आनी थळावे नागरीक पावस सुरू आसून लेगीत हे फेरयेंत वांटेकार जाले.
सॅम्युअलाच्या कुटुंबान म्हापशें पुलीस, व्हिडियो तयार करपी व्यक्ती आनी संबंदीत सोशल मिडिया प्लॅटफॉर्माचेर गंभीर आरोप करून हेच सगले जाण आपल्या चल्याच्या मरणाक कारण आशिल्ल्याचो दावो केलो.
काल (आयतारा) ही मूक मेणवात फेरी काडली. म्हजो भाव आतां ह्या जगांत परतून येवचो ना. पूण ताका न्याय तरी मेळूंक जाय अशी आमची मागणी आसा अशें मयत सॅम्युअलाचे भयणीन रडून सांगलें. तशेंच वकिलां कडेन चर्चा करूनच भावाची कूड ताब्यांत घेवपा विशींचो निमाणो निर्णय आमी घेतले अशेंय तिणें स्पश्ट केलें.
मुखार सामक्या जड अंतस्करणान उलयतना सॅम्युअलाचे भयणीन पुलिसांचे वर्तणुकीचेर प्रस्न उपस्थीत केलो. पुलिसांनी आपल्या भावाक चवकशेच्या नांवा खाला वराचीं वरां पुलीस स्टेशनार बसोवन दवरले. ताका बंद कॅबिनांत व्हेल्लो, थंय आमी ताचे बराबर नाशिल्लीं. त्या बंद कुडींत पुलिसांनी ताका कशी वागणूक दिली, हें देवाक खबर. पयलीं चवकशेच्या नांवा खाला ताचो छळ केलो. उपरांत सोशल मिडियाचेर व्हिडियो व्हायरल करून ताचें चारित्र्यहनन केले. ह्या अमानुश ट्रोलिंगाक लागून तो पुरायपणान गळसणिल्लो. फक्त भाव जितो आसतनाच न्हय तर ताच्या मरणा उपरांतूय कुडीचो अहवाल दिवपा खातीर पुलिसांनी आमकां मानसीक त्रास दिलो असो गंभीर आरोपूय तिणें ह्या वेळार केलो.
भाव सॅम्युअलाच्या मरणा उपरांतच्या तपासणेच्या अहवालांतल्यान एक धक्को दिवपी गजाल मुखार आयल्या. ताच्या दोळ्याक गंभीर दुखापत जाल्ल्याचें नमूद केलां. ही जखम ताका कशी जाली, आत्महत्ये पयलीं ताचे बराबर नेमकें कितें घडिल्लें, हाचो निश्पक्ष तपास जावचो अशी आमची मागणी आसा. जो मेरेन संबंदीत पुलीस निरिक्षक आनी उपनिरिक्षक हांकां ह्या प्रकरणाच्या तपासांतल्यान कुशीक काडून निलंबीत करिनात तो मेरेन ह्या प्रकरणाची पारदर्शक चवकशी जावंकूच शकना असोय दावो तिणें केलो.
आमकां त्या पिस्तुला विशीं कसलीच म्हायती ना. पूण तें पिस्तूल खंयच्यान आयलें, हाचे परस ज्या व्हिडियोक लागून आनी पुलिसांच्या संवेदनशीलतायेच्या उणावाक लागून सॅम्युअलान आपली जीण सोंपोवपाचें तोंकाचें पावल उबारलें, त्या दोशींचेर खर कायदेशीर कारवाय जावप चड गरजेचें आसा.
ह्या प्रकरणाचेर तिडक उक्तायतना समाजीक कार्यकर्ते जितेश कामत हांणी म्हणलें, पुलिसांनी संवेदनशीलतायेचो अभाव दवरून हें पुराय प्रकरण हाताळ्ळां. ज्या अधिकाऱ्यांनी सॅम्युअलाक आत्महत्येक प्रवृत्त केलें, तांकां तत्काळ सेवेंतल्यान बडतर्फ करूंक जाय. हरशीं पुलीस खंयच्याय गुन्यांवाचो तपास करतना ‘ढिम्म’ हालना. मागीर सॅम्युअला विशीं पुलिसांनी इतली तत्परताय दाखोवन ताकतिकेन गुन्यांव कसो नोंद केलो.
जो मेरेन सॅम्युअलाक पुराय न्याय मेळना आनी दोशींचेर कायदेशीर कारवाय जायना, तो मेरेन हो जनलढो थांबचो ना. ह्या अन्याया आड दाद मागपा खातीर आमी रोखडेच पुलीस म्हासंचालकाची भेट घेतले अशें काँग्रेस फुडारी विजय भिके आनी नौशाद चौधरी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
