भांगरभूंय | प्रतिनिधी
बेळगांव: अस्तंत घांट आनी दर्यादेग वाठारांत माॅन्सून सुरू जाल्ले खातीर खबरदारी म्हणून दक्षीण अस्तंत रेल्वेन (SWR) अखंड रेल्वे सेवा सुरू दवरपा खातीर, खास करून कर्नाटक-गोंय रेल्वे मार्गार व्यापक सुरक्षा आनी आपत्ती वेवस्थापन उपाय येवजण्यो लागू केल्यात.
माॅन्सून काळांत नेटाचो पावस, भूस्खलन आनी उदक भरपी सुवातांनी कर्नाटक-गोंय घांट वाठारांत रेल्वे प्रशासनान प्रतिबंधात्मक उपाय केल्यात.
माॅन्सुनाचे तयारीचो भाग म्हणून, SWR न तिनाईघांट आनी कुळें ह्या मार्गा वयल्या म्हत्वाच्या स्थानकांचेर फातर, रेंव भरिल्ल्यो पोतयो आदीं आपत्कालीन दुरुस्ती साहित्य साठयलां. घोग्यांनी पडपी पावस आनी भूस्खलन हांचे रेल्वे येरादारींत अाडखळ आयली जाल्यार तत्काळ कारवाय करपा खातीर एक्स्कॅव्हेटर, कॉम्प्रेसर आनी दुसरी यंत्र सामुग्री लेगीत तयार दवरल्या.
SWR चे मुख्य लोकसंपर्क अधिकारी डॉ. मंजुनाथ कनमाडी हांणी म्हळें की, घांट वाठारांतल्या संवेदनशील बोगद्यांच्या प्रवेशदारांचो विस्तार केला, जे खातीर रुळार माती वा फातर पडपाचो धोको उणो जाता. तशेंच माती थीर करप, फातर रोधक जाळयो, राखणे वण्टी, गॅबियन वण्टी आनी उदक निस्सारण वेवस्थेची सुदारणा करपाच्यो उपाय येवजण्यो केल्यात.
तेच भशेन म्हत्वाच्या पुलांचेर उदक पातळी निरिक्षण यंत्रणां बसयल्यात. विवीध केंद्रांतलें पर्जन्यमान नेमान तपासतलें . हुबळी हांगाच्या केंद्रीय नियंत्रण कार्यालयाक भारतीय हवामान खात्या कडल्यान मेळटात त्यो हवामाना विशींच्यो शिटकावण्यो रोखडेच क्षेत्रीय अधिकाऱ्यांक धाडटले.
अधिकाऱ्यांनी संवेदनशील वाठारांत माॅन्सून गस्त वाडयल्या, आनी घातक सुवातांचेर कर्मचाऱ्यांची नेमणूक केल्या. थळाव्या प्रशासना सांगाता जलाशयांची जोड तपासणी करून अचकीत उदक सोडप वा बांद फुटपाच्या धोक्यांक कमी करपाचो प्रयत्न केला.
कर्नाटक-गोंय रेल्वे मार्ग हजारांनी प्रवासी, पर्यटक आनी म्हाल येरादारी खातीर सामको म्हत्वाचो आसा. ह्या सगल्या उपाय येवजण्यां वरवीं माॅन्सून काळांत सुरक्षीतत आनी सुरळीत रेल्वे सेवा राखपाचो विस्वास दक्षीण अस्तंत रेल्वेन उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
