जीएसएससीः एक आव्हान

भांगरभूंय | प्रतिनिधी

गोंयांत आतां ज्यो परिक्षा जातल्यो ताचेर लक्ष मारल्यार हें दिश्टी पडटलें. खंयचोच भुरगो खेळांच्या माध्यमांतल्यान आपलें करियर करपाक पळोवचो ना.

ग्रामीण वाठारांतल्या भुरग्यांक लागून गोंय स्टाफ सिलॅक्शन हो विशय व्हडली चॅलेंज जाला अशें दिसता. चड शिकपाची गरज ना, SSC जाली काय GSSC तयारी करची.
खोलायेन उलयतां, GSSC आयोगाचो फायदो फक्त जीं भुरगीं प्रायव्हेट शाळांनी शिकतात तेच घेवंक शकतात. हांव फक्त आमच्या सत्तरी भागांतली परिस्थिती सांगतां. पूण राज्यांतल्या प्रत्येक ग्रामीण वाठारांत ही अशीच परिस्थिती जाल्ली आसा. आमच्या ग्रामीण वाठारांतले शेतकार, भाटकार लोक जमनीर रावून आपलीं पोटां भरतात. संवसारांत पदराक शिक्षण हें खू्ब म्हत्वाचें आसा. फुडें आयुश्याक एक वेगळेंच वळण मेळटा, शिस्त मेळटा. ग्रामीण वाठारांतल्यो सरकारी शाळा ताका साक्षिदार आसात. जो भुरगो सरकारी माध्यमीक विद्यालयांत शिकता, तो भलोय चड हुशार नासत पूण फुडें आयुश्याचे निर्णय शिस्तीन घेवपाक शकता. आयज आमी जर सत्तरींतल्या सरकारी शाळां कडेन पळयत जाल्यार इंग्लीश विशयांचेर खूब कमी लक्ष दितात. चडश्यो शाळा मराठी भाशेंत आसल्यो, हालींच तांकां इंग्लीश भाशेंत कन्वर्ट केल्यात. थोडे कडेन अजूनय थर्ड लॅंग्वेज इंग्लीश भाशा आसा.
भुरगीं बरी शिकतात बऱ्या मार्कांनी पास जाताय बी, पूण भुरग्यांची इंग्लीश भाशा उलोवप आनी बरोवप हाचेर कमी भर पडटा. मुद्दाम एक नदर घालून पळयात, ज्या भुरग्यांनी सरकारी शाळेंत शिक्षण घेतलां तांची परसँटेज तर बरी आसाच, पूण लॅंग्वेज खूब कमी दिश्टी पडटा. आनी एक गजाल खंयच्याच सरकारी शाळेंत कोंकणी हो विशय अजून तरी सक्तिचो ना. म्हत्वाचें म्हळ्यार GSSC पास जातलो जाल्यार तुजी इंग्लीश मात्शी फ्लुयॅंट आसप गरजेची आसा. आनी कोंकणी भाशेची जाण प्रत्येकांक आसपाक जाय. आमकां कोंकणी उलोवंक जमता पूण वचूंक आनी बरोवंक जमाना. इकरावेक, बारावेक पावतकच कोंकणी हो विशय आसताच, पूण आमकां मराठी भाशा लागींची दिसता. म्हणून भुरगीं थंयसर लेगीत मराठी विशय घेवपाक सोदतात. आतां इकरावेंत इंग्लीश विशय मात स्ट्रिक्ट आसता. पूण सगलेंच तकले वयल्यान वता. मुद्दाम भुरग्यांची टक्केवारी काडून पळयात. कमी जाता, ह्या कारणान बाकीचे विशय मात्शे फुडें-फाटीं जातात.
भुरगीं हुशार आसतात तीं तोंडपाठ करून कॉलेजींत उच्च शिक्षण घेतात. पूण तांची जी स्वताची बुद्धी आसता ती कमी दिसता. हाका लागून आमच्या ग्रामीण वाठारांतलीं भुरगीं फाटीं पडटात. GSSCक तोंड दिवपाक पावनात. थोडीं भुरगीं हुशार आसतात. मुखार बऱ्या व्हडल्या जाग्यार पावतात बरें ऑफिसर जातात, अशीं जाय तीं उदाहरणां आसात. पूण जीं भुरगीं सादारण आसतात तीं हातूंत फसतात.
सरकाराच्या नेमा प्रमाण सरकारी नोकऱ्यो ह्यो आयोगा खाला घेतल्यो वतल्यो. आतां घडये अशें दिसून येता. आवय- बापायन आपल्या भुरग्यांक प्रायव्हेट शाळांनी घालचे, जो मेरेन सरकार झाडाच्या मुळांत सारें आनी भर घालिना तो मेरेन बरीं फळां मेळचीं नात. आयोगाचो वायट परिणाम आवय- बापायच्या आनी भुरग्यांच्या मनार जावंक शकता. हाचे मुखार भुरगीं ग्रावंडार कसलोच खेळ खेळपाक सोदचीं नात, कसल्योच कला आनी सांस्कृतीक कार्यावळींनी लक्ष घालचीं नात, आमची परांपरा संस्कृती खंय तरी शेणटली. एखादो भुरगो आपलें शिक्षण एका वेगळ्या क्षेत्रांत घेवपाक सोदता जाल्यार तो ते घेवपाक पावचो ना. उदाहरण तबला वा हार्मोनियम, ह्या विशयांनी बरें प्रवीण मेळोवन तांचो कितें वालोर उरचो ना, शेवटाक तांका GSSCची फर्स्ट CBT पास करचीच पडटा.
गोंयांत आतां ज्यो परिक्षा जातल्यो ताचेर लक्ष मारल्यार हें दिश्टी पडटलें. खंयचोच भुरगो खेळांच्या माध्यमांतल्यान आपलें करियर करपाक पळोवचो ना. प्रत्येक जाण अभ्यासांत हुशार आसतात अशेंय ना, पूण जे कोण हेर गजालींनी हुशार आसात तांची खंय तरी वाट लागपाक शकता. हाचेर सरकारान नदर घालपाक जाय. कारण प्रत्येकाक एक सेक्युयर जॉब आपल्या हातांत आशिल्लो जाय. घडये आयोग जी परिक्षा घेता ताका लागून बरी तयारी करून पास जावं येता, पूण त्या भुरग्यांक शिस्त आसची ना, शारिरीक स्वास्थ्य आसचें ना. पुलीस, फॉरेस्ट गार्ड, हे अशे पोस्ट जाका फिजिकल फिटनेस खूब गरजेचो आसता. हातूंत फक्त टॅक्निकल पास जावन कोताक पडचें ना. तुजें शरीर आनी मन लेगीत घट्ट आसचें पडटा.
आयोग बंद करचो हो हेतू सांगिना हांव, पूण हाचेर सरकारान अभ्यास करचो पडटलो. ग्रामीण वाठारांतल्या भुरग्यांक हाचेर न्याय मेळचो ना. गरीब ते गरीबच उरतले आनी श्रीमंत आसा ते आनीक श्रीमंत जातले. सरकारान राजकारण करून ह्या विशया केडेन पळोवपूच न्हय तर समांतर कशी उरतली हाचेर लक्ष दिवप गरजेचें आसा, तेन्नाच आमाच्या ग्रामीण भागांचो विकास जातलो. हाचे मुखार सरकारी कर्मचारी भरती ही वेंचणूक तोंडार आसता तेन्ना जावची न्हय, हाची आयोगान काळजी घेवची.

आदित्य बोट्टरकार
8698836841