भांगरभूंय | प्रतिनिधी
पणजी: चालू शिक्षणीक वर्सां सावन खाजगी विद्यापिठांतल्या विद्यार्थ्यांक लेगीत सरकाराच्या विवीध शिश्यवृत्तींचो लाव घेवंक मेळटलो. हाका लागून एसी, एसटी, ओबीसी तशेंच इडब्ल्यूएस प्रवर्गांतल्या विद्यार्थ्यांक फायदाे जातलो अशें मुख्यमंत्री डॉ. प्रमोद सावंत हांणी सांगलें.
मंगळारा पारूल विद्यापिठा वतीन आयोजीत केल्ले कार्यावळींत ते उलयताले. ह्या वेळार डॉ. देवांशू पटेल, डॉ. पारूल पटेल, डॉ. कोमल पटेल, डॉ. सुधा पटेल, ललीत झा आनी विद्यापिठाचे हेर पदाधिकारी हाजीर आशिल्ले.
मुख्यमंत्र्यांनी म्हणलें, पारूल विद्यापिठाच्या स्वताच्यो कांय शिश्यवृत्ती आसात. खाजगी विद्यापिठांतल्या विद्यार्थ्यांक शिश्यवृत्ती दिवपचो विचार फाटल्या वर्सा केल्लो. पूण कांय तंत्रीक कारणाक लागून तें शक्य जालें ना. अंदूं शिक्षण खात्यान नेमांत बदल करून हाची अंमलबजावणी सुरू केल्या. खाजगी विद्यापिठांक गोंयांत विरोध जाल्लो. पूण सरकारान ठामपणान खाजगी विद्यापिठांक तेंको दिलाे. खाजगी विद्यापिठांक लागून दर वर्सां गोंयांतल्या सुमार एक हजार विद्यार्थ्यांक शिक्षणा खातीर हेर राज्यांनी वच्चें पडचें ना.
तांणी मुखार म्हणलें, फक्त बीए, बीकॉम वा बीएससी करून नोकरी मेळपाचे दीस सोंपल्यात. विद्यार्थ्यांनी कुशळटाय विकास करप गरजेचें आसा. गोंय 100 टक्के साक्षर राज्य जालां. आतां आमची मोख 100 टक्के तरणाट्यांक कुशळटाय विकास करपाचें आसा. हे खातीर गोंय सरकारा वतीन विवीध उपक्रम राबयल्यात. विद्यार्थ्यांनी सर्तीच्यो परिक्षा दिवपाचेर लेगीत भर दिवप गरजेचें आसा. फुडारांत गोंयांत खूबशे रोजगार, वेवसाय संदी उपलब्ध जातल्यो. थळाव्या तरणाट्यांनी हाचो लाव घेवप गरजेचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
