भांगरभूंय | प्रतिनिधी
पणजी, प्रतिनिधी : केंद्रीय साहित्य अकादमी वतीन अंदूंचे कविसंधी खातीर गोंय कला आनी नाट्य महाविद्यालयाचे प्राचार्य, कोंकणींतले नामनेचे नाटककार, निबंधकार, गीतकार डॉ. राजय पवार हांची निवड केल्या. ही कविसंधी आयतार ८ ऑक्टोबर सांजेवेळार ४.३० वरांचेर उड्डपी- कर्नाटकाच्या मेरीक्नोल हायस्कूल सभाघरांत आयोजीत केल्या.
ही कार्यावळ दी एक्सप्रेशन्स आनी कविता ट्रस्ट आनी साहित्य अकादमी हांच्या जोड पालवान आयोजीत केल्या. साहित्य अकादमीचे हे कार्यावळींत नामनेच्या कवींक आमंत्रीत करून तांच्या काव्यप्रवासा विशीं जाणून घेता. ह्या निमतान कर्नाटकांत गोंयचें आनी कोंकणी कवितेचें प्रतिनिधित्व डॉ. पवार करतले.
हे कार्यावळींत कवींच्या नेमून काडिल्ल्या कवितांचो आस्वाद घेता. ताचे उपरांतचे कार्यावळींत आमंत्रीत कवींचें कवीसंमेलन आयोजीत केलां. ह्या कवी संमेलनाच्या अध्यक्षपदार डॉ. पवार आसतले.
डॉ. पवार हे सध्या कला आनी नाट्य म्हाविद्यालय फोंडें हांगा प्राचार्य पदाचेर कार्यरत आसात. राज्य आनी राष्ट्रीय पांवड्यां वेल्या सर्तीं खातीर डॉ. पवार हांणी खुबश्या कोंकणी नाटकांचें दिग्दर्शन केलां. तांच्या साहित्यीक योगदाना खातीर तांकां खुबशे पुरस्कारूय फावो जाल्यात. तांकां भारतीय भाशा परिशद, कोलकाता हांचो प्रतिश्ठीत राष्ट्रीय पुरस्कार मेळ्ळा. परिशदेच्या इतिहासांत कोंकणी भाशे खातीर मेळिल्लो हो पयलोच पुरस्कार. तांकां कविता ट्रस्ट, मंगळुरू, कर्नाटकचो प्रतिश्ठीत राष्ट्रीय पुरस्कारूय फावो जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
