भांगरभूंय | प्रतिनिधी
कामांत येस आयल्यार हें तंत्रज्ञान हेर कडेन वापरतले: सुभाष शिरोडकार
मडगांव: साळ न्हंयेचें प्रदुशण आडावपा खातीर नव्या तंत्रज्ञानाचो वापर करतात. ते प्रमाण खारेबांदार साळ न्हंयेच्या पात्रांत जिओ ट्यूब तंत्रज्ञानान घाण उदकाच्या शुद्धीकरणाचो शुभारंभ केलो. ह्या कामांत येस आयल्यार हें तंत्रज्ञान हेर कडेन वापरतले अशें उदका स्रोत मंत्री सुभाष शिरोडकार हांणी सांगलें.
मडगांव खारेबांदार जाल्ले कार्यावळी वेळार मंत्री सुभाष शिरोडकार हांचे सयत मडगांवचे आमदार दिगंबर कामत, बाणावलीचे आमदार व्हेंझी व्हिएगश, वेळ्ळीचे आमदार क्रुझ सिल्वा, अभियंतो बदामी तशेंच हेर अधिकारी हाजीर आशिल्ले.
मंत्री सुभाष शिरोडकार हांणी सांगलें, गोंयांतल्या उदकाचें स्रोत आनी प्रवाह हांचें संवर्धन करपाची गरज आसा. ते नदरेंतल्यान गोंय सरकार गरजेच्यो त्यो सगल्यो उपाय येवजण्यो करता. वेळावेळार नव्या तंत्रज्ञानाचो वापर करून न्हंयांची नितळसाण राखपाचे ध्येय सरकाराचें आसा. ते प्रमाण जिओ ट्यूब ह्या तंत्रज्ञानाचो वापर करपाचें थारायलां. सुरवातेक प्रायोगीक तत्वाचेर साळ न्हंयेच्या नाल्यार तंत्रज्ञानाचो वापर करतले. हांगा ह्या तंत्रज्ञानाचो वापर करून घण उदकाचेर प्रक्रिया करून तें शुद्ध केले उपरांत साळ न्हंयेच्या प्रवाहांत सोडटले. हो प्रकल्प सद्या प्रायोगीक तत्वाचेर सुरू केला. हो प्रयोग येसस्वी थारल्यार अशेच तरेन जिओ ट्यूब ह्या तंत्रज्ञानाचो वापर करून हेर कडेनूय उदकाचे प्रवाह नितळ राखूंक येतले अशेंय शिरोडकार हांणी म्हणलें.
आमदार व्हेंझी व्हिएगश हांणी सांगलें, साळ न्हंयेच्या प्रदुशणाचो मुद्दो गंभीर आसा. हे खातीर सेगीत गोंय सरकारा कडेन साळ न्हंयेच्या नितळसाणी खातीर मागणी करीत आयलां. हाचें आदीं साळ न्हंय इतली नितळ आशिल्ली की तातूंत नुस्तेमारी करताले. लोक न्हाताले. तशेंच येरादारीय करताले. सद्या न्हंयेच्या प्रदुशणाक लागून सगल्यो गजाली ठप्प जाल्यात. ताका लागून जिओ ट्यूब ह्या नव्या तंत्रज्ञानाचो वापर करून साळ न्हंयेचो प्रवाह नितळ राखपाचे यत्न जायत आसात. हे खातीर सरकाराचे उपकारी आसात. हाचे पयलीं कितें जालें हाचे परस फुडारांत कितें करुया हाचे कडेन लक्ष दिवया अशें तांणी म्हणलें.
आमदार दिगंबर कामत हांणी म्हणलें, सद्या मडगांव शाराचो नव्यान आराखडो तयार करपाचें काम सुरू आसा. तातूंत विवीध पर्यटनांचे स्पॉट अधोरेखीत करपाक सांगलां. तातूंत साळ न्हंय हो एक स्पॉट आसा. न्हंयचें प्रदुशण पयस करून न्हंय नितळ राखपाचें काम जिओ ट्यूब तंत्रज्ञानाचो वापर करून करतात. मडगांवच्या चडशा वाठारांतले घाण उदकाच्या वाहिन्यांचें काम पुराय जायत आयलां. घराघरांनी जोडणी दिवपाचें काम 80 टक्के पुराय जालां. राज्य सरकारा कडल्यान घाण उदकाची जोडणी घेवपा खातीर येवजण तयार केल्या. ताचो फायदो लोकांनी घेवचो. नाजाल्यार कांय काळा उपरांत राज्य सरकारा कडल्यान गरजेची ती कारवाय करपाचें थारूं येता. ताका लागून प्रदुशण आडावपा खातीर लोकांनी घाण उदकाची जोडणी घेवची अशें आवाहन कामत हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
