भांगरभूंय | प्रतिनिधी
रस्तो रुंदीकरण कामाक सुरवात, चार कोटी ७८ लाख खर्च
दिवचल, प्रतिनिधी : दिवचल म्हालांतल्या साळ ते कासारपाल रस्त्याचें फाटल्या पंचवीस वर्सां सावन रुंदीकरण वा विस्तारीकरण जावंक नाशिल्ल्यान ह्या कामाची सुरवात जाल्या. आमदार डॉ. चंद्रकांत शेट्ये हांणी पळोवणी करून ह्या कामा विशीं संबंदीत अधिकार्यां कडल्यान म्हायती घेतली. कामाचो खर्च सुमार चार कोटी ७८ लाख आसा, रस्त्याची लांबाय साडेस मिटर जाल्यार रुंदाय स मिटर आशिल्ल्याचें तांणी सांगलें. ह्या रस्त्याचें फाटल्या कितल्याशाच वर्सां सावन दोनूय वटेन विस्तारीकरण जावंक नाशिल्ल्यान हो रस्तो सारको जावपाची गरज आसली.
दिवचल मतदार संघाच्या उदरगतीच्या कामां खातीर सरकारा कडल्यान निधी मंजूर जाल्ल्यान आतां मेरेन सरकाराचे निधीचो पुरायेन वापर करून शारा सयत गांवगिर्या वाठारांचीय उदरगत करतले. लोकांचे मागणे प्रमाण उदरगत करतले. शारांतल्या वाठारांची उदरगत जायतूच आसता. वांगडा गांवगिर्या वाठारांचीय उदरगत जावप काळाची गरज आशिल्ल्यान जनतेन सहकार्य करचें. रस्ते, उदक आनी वीज ह्यो मोलादीक गरजो लोकां मेरेन पावप गरजेचें अशें डॉ. शेट्ये हांणी सांगलें. ह्या कामाक मंजुरी दिल्ले खातीर आमदार डॉ. शेट्ये हांणी मुख्यमंत्री डॉ. सावंत आनी मंत्री निलेश काब्राल हांचे उपकार मानले.
ररत्याच्या कामाची पळोवणी करतना साळची सरपंच सावित्री घाडी, उपसरपंच देवू रावत, लाटंबारसे सरपंच पद्माकर मळीक, उपसरपंच त्रिषा राणे, बांधकाम अधिकारी आनी हेर पंचायत वांगडी हाजीर आशिल्ले. हें काम हातांत घेतिल्ले खातीर ग्रामस्थांनी आमदार डॉ. शेट्ये हांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
