भांगरभूंय | प्रतिनिधी
बिड, खबरां संस्था: बिड शारांत एका वर्साच्या भुरग्याक साडेतीन लाख रुपयांक विकपाचो यत्न पुलिसांनी आडायलो. घोवान सोडून दिल्ले २० पिरायेचे बायलेक दुसरें लग्न जावया अशें सांगून तिच्या एका वर्साच्या भुरग्याक गोंयांत हाडून साडे तीन लाख रुपयांनी विकलें.
मजगतीं, हे विशीं म्हायती मेळटांच पुलिसांनी कारवाय करून पांच आरोपींक अटक केल्या. विकिल्लें भुरगें सध्या बरें आसा. ताका ताच्या आवयच्या ताब्यांत दिलां.
पुलिसांनी दिल्ले म्हायती प्रमाण, २० पिरायेचे पिंटीचे (नांव बदल्लां) एका तरणाट्या वांगडा प्रेमसंबंद आशिल्ले. तिणें एका चल्याक जल्म दिलो.
मजगतीं, ही सगळी खबर कळटांच तिच्या घोवान तिका सोडली. ताका लागून पिंटी फाटल्या कांय दिसां सावन आपले आवय कडेन आशिल्ली. माजलगाव हांगा ती आवयगेर रावताली. ह्या काळांत माजलगांवांतले वळखीचे आशिल्ले छाया हांच्या घरा पिंटीचें यो वच सुरू जालें. विशेश म्हळ्यार किशोर भोजने नांवाचो तरणाटोय छायाच्या घरा येतालो. ह्या वेळार ताची पिंटी कडेन वळख जाली आनी तांणी पिंटीच्या एका वर्साच्या चल्याक आपलें नांव दिलें. ह्या वेळार छायान पिंटीक दुसरें लग्न करून दिवपाचें सांगलें. आनी पिंटीचें भुरगें कोल्हापुरांतल्या ललिता नांवाचे बायलेचे मजतीन विकपाचो प्लॅन केलो.
विशेश म्हळ्यार ललिता भुरगीं विकपाचो धंदो करताली. ते प्रमाण तिणें आपल्या इश्टाचे मजगती गिरायक सोदलें आनी साडे तीन लाखांक भुरगें विकलें. हाची म्हायती मेळटाच अनैतीक मानवी वाहतूक प्रतिबंधक विभागान कारवाय करून त्या भुरग्याची गोंयच्यान सुटका केली. तशेंच पांच दुबावितांक अटक केली.
छाया श्रीराम देशमुख (३८, शाहूनगर, माजलगांव), किशोर वासुदेव भोजने (३२, बुलढाणा), ललिता मनोहर भिसे ( ३८ , हातकणंगले जि. कोल्हापूर), दिपक गव्हाळकर ऊर्फ गवळी (रा. बेळगांव, कर्नाटक), आप्पा राघोबा केरकार (६५), नामदेव फोंडू सावंत (६०) आनी स्वप्नजा महादेव जोशी (३८, सत्तरी) अशीं आरोपींचीं नावां आसात. हांतले दीपक आनी ललिता हीं दोगांय फरारी आसात. तांचो सोद पुलीस घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
