भांगरभूंय | प्रतिनिधी
दाबाळ-फोंडें मार्गा वयली येरादारी ठप्प
फोंडें: सांतेरीमळ-निरंकाला काल (सोमारा) सकाळीं 6.45 वरांच्या सुमाराक घातक स्थितींत आशिल्लें झाड मुखेल रस्त्यार कोसळिल्ल्यान सुमार वरभर दाबाळ-फोंडें मार्गा वयली येरादारी ठप्प जाली. फोंडें उजो पालोवपी दळाच्या जवानांनी घडणूक थळार धांव घेवन रस्त्यार पडिल्लें झाड कुशीक काडले उपरांत येरादारी सुरळीत जाली.
मेळिल्ले म्हायती प्रमाण सोमारा सकाळीं घातक स्थितींत आशिल्लें झाड मुखेल रस्त्यार पडलें. झाड पडपा वेळार रस्त्यार कोणूच नाशिल्ल्यान दुर्घटणा टळ्ळी. ह्या मार्गा वयली येरादारी ठप्प जाल्ल्यान रस्त्यार पडिल्ल्या झाडाची म्हायती मेळटकूच थळावे पंच वांगडी मधू खांडेपारकार हांणी फोंडें उजो पालोवपी दळाक म्हायती दिली.
जवानांनी घडणूक थळार धांव घेवन झाड कुशीक काडले उपरांत मार्गा वयली येरादारी सुरळीत जाली. निरंकाल वाठारांत खूबशा सुवातींनी घातक झाडां रस्त्याचे कुशीक आसून एखाद्री दुर्घटणा घडचे पयलीं घातक झाडां कापपाची मागणी थळाव्या लोकां कडल्यान जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
