भांगरभूंय | प्रतिनिधी
दिवचल: दत्तवाडी सांखळे पुला वयल्यान सांखळेचे एके जाण्टे बायलेन व्हाळवाट न्हंयेंत उडी घेवन आत्महत्या करपाचो यत्न केलो. सुदैवान ती वाटावली. न्हंयेंत पडले उपरांत खोल उदकांत वचनासतना ती तळप वाठारांत पडिल्ल्यान ती वाटावली. उपरांत एका तळपार बशिल्ले ते बायलेक दिवचल उजो पालोवपी दळाच्या जवानांनी न्हंयचे देगेर हाडून तिचो जीव वाटायलो.
ही घडणूक 31 मे दिसा सकाळीं 6.30 वरांच्या सुमाराक घडली. दत्तवाडी सांखळेची आलेक्सीया लोबो (65) हे जाण्टे बायलेन दत्तवाडी पुला वयल्यान व्हाळवाट न्हंयेंत उडी मारली. पूण जीव सोंपोवपाचो केल्लो यत्न फळादीक जावंक नाशिल्ल्यान ती एका तळपार बसली.
हो प्रकार लक्षांत येतकूच कोणेतरी पणजेंतल्या नियंत्रण कक्षा कडेन संपर्क सादून म्हायती दिली. नियंत्रण कक्षा कडल्यान दिवचल उजो पालोवपी दळाक सकाळीं 6.43 वरांचेर म्हायती दिली. ही म्हायती मेळटकूच दिवचल उजो पालोवपी दळाचे अधिकारी राहूल देसाय हांच्या मार्गदर्शना खाला उजो पालोवपी दळाच्या जवानांनी सांखळे धांव घेतली आनी न्हंयेंत देंवून ते जाण्टे बायलेक देगेर हाडली.
ह्या बचावकार्यांत दिवचल उजो पालोवपी दळाचे विठ्ठल गांवकार, विठ्ठल गाड, रुपेश पळ, हर्षद सावंत, गौरेश गांवस, विष्णू राणे, अनूप नायक हांणी वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
