भांगरभूंय | प्रतिनिधी
काँग्रेस: घुंवळे वखदां, शिंदळकी, खंडणी ह्या गजालींक लागून गोंयचें नांव जाता पेड्डेर
म्हापशें: गोंय हें संवसारीक पर्यटन थळ म्हूण वळखतात. पूण फाटल्या 10 वर्सांत गोंयांत घुंवळे वखदांचो वेव्हार, शिंदळकी वेवसाय, खंडणीचे प्रकार ह्या गजालींक लागून गोंयचें नांव पेड्डेर जायत आसा. गोंय सरकाराक हाचेर नियंत्रण दवरपाक येस आयलें ना. घुंवळे वखदां घेवप्यांचेर कारवाय करचे परस ड्रग्स नॅटवर्क नानपयत करचें अशी मागणी विजय भिके हांणी केली.
काल (मंगळारा) म्हापश्यां काँग्रेस कचेरेंत आयोजीत केल्ले पत्रकार परिशदेंत काँग्रेसीचे सरचिटणीस विजय भिके उलयताले. ह्या वेळार विकास प्रभुदेसाय, जिल्होध्यक्ष विरेंद्र शिरोडकार, उत्तर गोंय युवा अध्यक्ष रोनाल्डो रुझारियो आनी दक्षीण गोंय युवा अध्यक्ष महेश नदार हाजीर आशिल्ले.
विजय भिकेन म्हणलें, हालींच्या काळांत ड्रग्साचो विक्री वेव्हार व्हड प्रमाणांत वाडला. ड्रग्स निर्मितीचे कारखाने आनी प्रयोग शाळा सांपडूंक लागल्यात. विमान मार्गान ड्रग्स गोंयांत पावूंक लागल्यात. दर्यादेग वाठारांत ड्रग्स माफियांनी खवदळ घाला. ह्या प्रकरणांत पुलीस म्हासंचालकांक काँग्रेसी कडल्यान निवेदन सादर करतले.
रोनाल्डो रुझारिओ आनी महेश नदार हांणी म्हणलें, तरणाट्यां मदीं ड्रग्साचे सेवन करपाचें प्रमाण 85 टक्के आसा. ड्रग्स भलायके खातीर कितलें लुकसाण करपी आसा हाची लोकजागृताय करपाक सरकार अपेशी थारलां. काँग्रेसी कडल्यान रोखडीच ड्रग्सा आडचे जागृताये संबंदीची मोहीम राबयतले अशी म्हायती भिके हांणी दिली.
कोलवाळ बंदखणींत ड्रग्साचो विक्री वेव्हार सुरू आसा. बंदखणींतल्यान गुन्यांवकार खंडणीचें नॅटवर्क चलयतात आनी वेवसायिकांक खंडणी खातीर धमकीचे फोन येवंक लागल्यात. सद्या कोलवाळ बंदखणींत ह्या गुन्यांवकारी कारवायांचो अड्डो जाला. हे बंदखणींत सगले कडेन सीसीटीव्ही कॅमेरे उबारचे आनी ह्या कॅमेरांतले फुटेजीची दर दिसा पडटाळणी करची अशी मागणी विजय भिके हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
