भांगरभूंय | प्रतिनिधी
फोंडे ः सरकाराची प्रधानमंत्री विश्वकर्मा येवजण फुडल्या नोव्हेंबर म्हयन्या सावन सुरू जातली. तेच बरोबर दसऱ्याच्या निमतान स्वयंपूर्ण ई – बाजार सुरू करतले अशें मुख्यमंत्री डॉ. प्रमोद सावंत हांणी बेतोडा सभघरांच्या उक्तावण सुवाळ्यांत सांगलें.
ह्या वेळार पंचायत मंत्री मावीन गुदिन्हो, उदकास्रोत मंत्री सुभाष शिरोडकार, गोंय साधन सुविधा मंडळाचे उपाध्यक्ष केदार नायक, पंचायत उपसंचालक प्रसिद्ध नायक, गट उदरगत अधिकारी अश्विन देसाय, सरपंच उमेश गावडे, उप सरपंच चित्रा सालेलकार आनी हेर पंच वांगडी हाजीर आशिल्ले.
पंचायत हें गांवच्या उदरगतीचें केंद्र आशिल्ल्यान सगळ्यांनी जापसालदारकी घेवची आनी सरकारी मालमत्तेची जतनाय घेवपाचो यत्न करचो. सरकारान सुरू केल्ले येवजणेचो लाव सगल्यांनी घेवन स्वावलंबी जावपाची गरज आसा अशें मुख्यमंत्री सावंत हांणी सांगलें.
सगळ्यांक सरकारी नोकरी दिवप अशक्य आसा. पूण सरकारी येवजणेचो फायदो घेतल्यार रोजगाराची समस्या सुटावी जातली. मुख्यमंत्री सावंत हांच्या मार्गदर्शना खाला सरकार गोंयाक नवी दिका दिवपाचो यत्न करता अशें गुदिन्हो हांणी सांगलें.
गोंय स्वावलंबी करपा खातीर आदर्श गांव तयार करतना तरणाट्यांनी दुद, नुस्तें आनी शेतकी वेवसायांत रूची दाखोवपाची आनी तेच बरोबर पारंपारीक वेवसायाचेर तरणाट्यांनी लक्ष दिवपाची गरज आसा अशें सुभाष शिरोडकार हांणी सांगलें. गोंय साधन सुविधा मंडळान बांदिल्ल्या सभाघर लोकांनी वापरपाची गरज आसा अशें केदार नायक हांणी सांगलें.
सरपंच उमेश गावडे हांणी येवकार दिलो. गौरी शिरोडकार हांणी सूत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
