भांगरभूंय | प्रतिनिधी
कृष्णा साळकार: पुलीस, उपजिल्होधिकारी कचेरेक निर्देश
रस्ताद सुण्यांक खावपाक दिवप्यां आड उबारलीं पावलां
वास्को: कांय जाण रस्ताद सुण्यांक चिकन विक्रेत्यां कडेन उरिल्लें हरवें मांस, पांय, हाडां खावपा खातीर दीत आशिल्ल्यान हीं सुणीं आक्रमक जातात. ताका लागून रस्ताद सुण्यांक हरवें मांस, हाडां खावपा खातीर दितना एखाद्रो मनीस दिसल्यार पयले फावटी ताका समज दिवची. उपरांतूय आयकले ना जाल्यार रोखडीच अटक करपाचे निर्देश आपणे पुलीस आनी उपजिल्होधिकारी कचेरेक दिल्ल्याचें वास्कोचे आमदार कृष्णा साळकार हांणी सांगलें.
मायमोळ्यां एके बायलेक रस्ताद सुण्यांनी हल्लो करून गंभीर जखमी केल्ल्याची घडणूक दोन दिसां पयलीं घडिल्ली. हाका लागून लोकां मदीं तिडकीचें ल्हार पातळिल्लें. ह्या प्रकरणांत आमदार साळकार हांणी गंभीर दखल घेतल्या. हांगा कांय मनीस चिकन विक्रेत्यां कडेन उरिल्लें कोंबयेचें भायर उडोवपी अवयव एकठांय करून रस्ताद सुण्यांक खावपाक घालतात. ताका लागून सुणीं आक्रमक जातात. जांकां ह्या सुण्यांक कितेंय खावपाक घालपाचें आसत जाल्यार तें शिजोवन वा शिजयिल्लें अन्न तांकां दिवचें अशें साळकार हांणी म्हणलें.
जे प्रमाण वास्कोंतल्या हेडग्या गोरवांक धरून गोशाळेंत धाडून दितात तेच धरतेर रस्ताद सुण्यां खातीर एक निवारो उबारून थंय तांची योग्य निगा राखपा खातीर विचार आशिल्ल्याचें तांणी सांगेलें.
मजगतीं, रस्ताद सुणीं आक्रमक जावची न्हय हे खातीर संबंदितांनी उपाय येवजण हातांत घेवपाची गरज नागरिकांनी उक्तायली. हांगा कांय प्राणी मोगी चिकन विक्रेत्यां कडल्यान कापिल्ल्या कोंबयांचें अवयव एकठांय करतात आनी ते जंय रस्ताद सुणीं आसतात थंय वचून तांकां दितात. ताका लागून ह्या मनशांची तीं सुणीं वाटूच पळयत आसतात. केन्नाय तांकां खावपाक मेळ्ळें ना जाल्यार तीं सैरभैर जातात. कांय मनीस वेगळ्यावेगळ्या हॉटेलांतल्यान शिळें अन्न एकठांय करून रस्ताद सुण्यांक दितात.
मजगतीं, ते एक खबरदारी घेतात, ते जंय रावतात त्या वाठारांतल्या रस्ताद सुण्यांक सदर अन्न खावपाक घालिनात. हाचे फाटलें कारण म्हणल्यार आपल्या वाठारांत रस्ताद सुण्यांचो त्रास स्वताक आनी आशिकुशीच्या लोकांक जावचो न्हय असो आसुये. हेर सुवातांनी आशिल्ल्या रस्ताद सुण्यांक ते अन्न दितात असो दावो कांय जाणांनी केला.
कांय वेळा संबंदीत मनीस रस्ताद सुण्यांक भरपूर अन्न रस्त्यारूच घालतात. कांय वेळा तीं रस्ताद सुणीं ते अन्न खायनात. ताका लागून ते अन्न हेर कडेन पातळून ताची घाण पातळटा. ताचो त्रास आशिकुशीच्या लोकांक जाता. ह्या प्रकरणांत कांय प्राणीमोगींक थळाव्यांनी रस्त्यार अन्न घालपाक प्रतिबंध केल्लो. ताका लागून प्राणीमोगी एका मनशा आड पुलीस कागाळ केल्ली.
एक मनीस नुस्त्या मार्केटांतले व्हड नुस्त्यांचे टाकावू अवयव एकठांय करून ते शिजय नासतना रस्ताद सुण्यांक दीत आशिल्ल्याचें कांय जाणांनी सांगलें. प्राणीमोगींनी रस्ताद सुण्यांक शिजयिल्लें अन्न दिवचें. सदर अन्न भौशीक सुवातेर दिनासतना एखाद्या निर्जन थळार दिवचें. जेणे करून रस्ताद सुणीं भौशीक सुवातांनी येवचीं नात अशें मत कांय जाणांनी उक्तायलें.
मुरगांव पालिका, प्राणीमोगी, पिपल्स फॉर अॅनिमल, समाजीक संस्था, नागरीक हांची बसका आपोवन हे संबंदी चर्चा करपाची गरज आसा. ते बसकेंतल्या निर्णयांची अंमलबजावणी करची. असो प्रस्ताव कांय जाणांनी मांडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
