सत्तरी तालुका शेतकार संस्थेच्या संचालक मंडळा मदीं मतभेद

भांगरभूंय | प्रतिनिधी

9 मदल्या 5 संचालकांनी अध्यक्षाचेर हाडलो अविस्वास थाराव

वाळपय: सत्तरी म्हालांतल्या शेतकार भावांची म्हत्वाची अशी सत्तरी तालुका शेतकार संस्थेची संकश्टां सोंपून सोंपनात अशी परिस्थिती निर्माण जाल्या. संस्था स्थापन जायत सावन ते आतां मेरेन ह्या संस्थेच्या संचालक मंडळांत सेगीत अस्थिरताय निर्माण जायत आसता. फाटल्या पांच वर्सां सावन ह्या संस्थेचो कारभार सुरळीतपणान सुरू आशिल्लो. पूण परतून एकदां संस्थेच्या संचालक मंडळांत मतभिन्नताय निर्माण जाल्या. संस्थेच्या णव मदल्या पांच संचालकांनी संस्थेचे अध्यक्ष पांडुरंग गांवस हांचेर अविस्वास थाराव दाखल केला. हाका लागून संस्था परतून एकदां वादांत सांपडपाची शक्यताय निर्माण जाल्या.
ह्या अविस्वास थारावाक लागून संस्थेक परतून एकदां संकश्टांक तोंड दिवचें पडटलें आनी हाका लागून संस्थेच्या वेव्हाराचेर परिणाम जावपाची शक्यताय आसा.

पांच संचालका कडल्यान
अविस्वास थारावाची नोटीस
ह्या संस्थेच्या वट्ट 11 संचालकपदा खातीर फाटल्या वर्सा वेंचणूक जाल्ली. दोन विभागांतल्यान ही वेंचणूक घेतिल्ली. भाग क्रमांक एकांतलल्यान पांडुरंग गांवस, सगुण वाडकार, प्रदीप गवडंळकार, अनील काटकार, सुरंगा नायक, शहाजी देसाय, नारायण गांवकार हांची निवड जाल्ली. जाल्यार भाग क्रमांक दोनांतल्यान सिताराम देसाय, अँड. गणपत गांवकार हांची निवड जाल्ली.
उपरांत संचालक मंडळाची म्हत्वाची बसका जावन पांडुरंग गांवस हांची बिनविरोध अध्यक्षपदार निवड जाल्ली जाल्यार उपाध्यक्षपदार सगुण वाडकार हांची निवड जाल्ली.
एका वर्सा सावन ह्या संस्थेचो कारभार सुरळीत सुरू आशिल्लो. ह्या संचालक मंडळान संस्थेच्या विकासा खातीर म्हत्वाचें योगदान दिलां. विवीध प्रकारचे उपक्रम राबयल्यात. हाका लागून ह्या संस्थेच्या विकासाचो मार्ग मेकळो जाला अशे तरेच्यो प्रतिक्रिया सभासदांनी उक्तायिल्ल्यो.
संस्थेच्या संचालक मंडळाची वेंचणूक जावन एक वर्स जालें. पूण कांय संचालक मंडळांत मतभिन्नता निर्माण जाली आनी वट्ट णव संचालकां मदीं पांच संचालकांनी संस्थेचे अध्यक्ष पांडुरंग गांवस हांचे आड अविस्वास थारावाची नोटीस जारी केल्या. सदर नोटीस सहकार खात्याच्या सत्तरी-दिवचल विभागाच्या उपसंचालका कडेन सादर केल्या. हे नोटिसीचेर संचालक प्रदीप गवडंळकार, नारायण गांवकार, अनील काटकार, सिताराम देसाय आनी गणपत गांवकार हांच्यो सयो आसात.
ह्या संस्थेच्या संचालक मंडळाचेर वट्ट 11 सभासदां मदीं भाग एकांतल्यान 8 जाल्यार भाग दोनांतल्यान 3 संचालकांचो आस्पाव आसप गरजेचें आसा. पूण वेंचणूक जाले उपरांत भाग एकांतल्यान 8 मदल्या 7 संचालकांची निवड केली. उरिल्ल्या एका संचालकपदार आवश्यक पात्रतायेचो उमेदवार मेळूंक नाशिल्ल्यान ही सुवात रिती आसा. जाल्यार भाग क्रमांक दोनांतल्यान तिना मदल्या दोन उमेदवारांची निवड जाल्ल्यान एक पद रितें जालां. एक वर्स जावन गेलें तरी लेगीत ह्या पदार नव्या संचालकांची नेमणूक केल्ली ना.
ह्या संचालक मंडळाचे व्यतिरिक्त कृशी खात्याचो एक सभासद नियुक्त संचालक आसता. तेच प्रमाण सहकार खात्या वतीन एका संचालकाची नेमणूक करतात. तातूंतल्या कृशी खात्या वतीन वाळपय विभागाचे कृशी अधिकारी विश्वनाथ गांवस आनी सहकार खात्या वतीन प्रेमानंद चावडीकार हांची निवड केल्या. हाका लागून सदर संचालक मंडळ हें 13 जाणांचें आसप गरजेचें आसता. पूण दोन संचालकांची निवड जावंक नाशिल्ल्यान हें संख्याबळ 11 जालां.
मजगतीं, हे विशीं मेळिल्ले म्हायती प्रमाण वट्ट पांच संचालकांनी जाहीर केल्ले अविस्वासाचे नोटिसीचेर विचार विनिमय आनी वेंचणूक घेवपा खातीर रोखडीच सगल्या संचालकांची बसका आपयतले अशी म्हायती गोपां कडल्यान मेळ्ळ्या. हे विशीं सहकार खात्याच्या अधिकार्‍यां कडेन संपर्क सादपाचो यत्न केलो तेन्ना तांचे कडेन संपर्क जावंक शकलो ना. पूण हे विशीं अधिकृतपणान मेळिल्ले म्हायती प्रमाण फुडल्या सप्तकांत अविस्वास थारावाचेर चर्चा करपा खातीर बसका आपयतले अशें समजता.