भांगरभूंय | प्रतिनिधी
उजो पालोवपी दळाची इतिहासांतली विशेश कामगिरी
वाळपय: सत्तरी म्हालांतल्या सांवड्डें तार हांगा झाडार आडकून उरिल्ल्या मनशाक जिवदान दिवपा खातीर वाळपय उजो पालोवपी दळाच्या जवानांक सुमार दोन वरां झूज दिवची पडली. निमाणें ताका येसस्वी रितीन जिवदान दिलें. धावें सत्तरी हांगासरलो फटो माईणकार (60) अशें ताचें नांव आसून सद्या ताका वाळपयच्या सरकारी समाजीक हॉस्पिटलांत मुळाव्या उपचारा खातीर दाखल केला.
ही घडणूक काल (मंगळारा) सकाळीं घडली. फटो माईणकार सांवड्डें तार हांगासरल्या एका झाडार झाडाच्यो खांदयो मारपा खातीर चडिल्लो. सुमार 15 मिटर उंच झाडर तो खांदयो मारीत आसतना मदींच आडकून उरलो. ताका सकयल देंवूक जमना जालें. थळाव्यांनी यत्न करून ताका सकयल देंवोवपाचो यत्न केलो. पूण तांकां येस आयलें ना. निमाणें वाळपयच्या उजो पालोवपी दळाक हे विशींची म्हायती दितकूच दळाचे जवान घडणूक थळार दाखल जाले. सुमार दोन वरां खर यत्न केले उपरांत फटो माईणकार हाका सकयल देंवोवपाक येस आयलें. उजो पालोवपी दळाचे हवालदार ज्ञानेश्वर गांवस हांच्या फुडारपणा खाला ही मजत केली.
हे विशीं दिल्ले अदीक म्हायती प्रमाण झाडाच्यो खांदयो मारपा खातीर तो सकाळीं णव वरांचेर झाडार चडिल्लो. कांय प्रमाणांत झाडाचे खांदे ताणें मारिल्ले. उपरांत सकयल देंवता आसतनाच तो झाडाच्या खांदये मदींच आडकून उरलो. माईणकार हो झाडा मारपा खातीर तरबेज आसा. हाचे पयलीं ताणें खूबशीं झाडां मारल्यांत. खंयच्याय खिणाक धोको निर्माण करिनासतना बरे तरेन झाडां मारता. हे खातीर ताची एक वेगळीच वळख आसा.
पूण काल मात ताचे खातीर वायट दीस आशिल्लो. वाळपय उजो पालोवपी दळाच्या जवानांनी निसण लावन ताका दोनूय वटांनी बांदून वेवस्थीत सकयल देंवयलो. ह्या वेळार तो बेशुद्ध अवस्थेंत पडिल्लो. ताका शुद्धीर हाडून वाळपय सरकारी समाजीक हॉस्पिटलांत उपचारा खातीर दाखल केला. सद्या ताची भलायकी हुस्क्या भायर आशिल्ल्याचें वैजकी अधिकाऱ्यांनी सांगलें.
मजगतीं, वाळपय उजो पालोवपी दळाच्या जवानांनी फटो माईणकार हाका जिवदान दिल्ले खातीर थळाव्या लोकांनी दळाचें अभिनंदन केलें. जिवाची पर्वा करिनासतना जवानांनी झाडार चडून ताका वेवस्थीत सकयल देंवयलो. हे खातीर तांकां थळाव्यांची बरी मजत मेळ्ळी.
हे विशीं प्रतिक्रिया दितना ज्ञानेश्वर गांवस ह्या दळाच्या अधिकाऱ्यान सांगलें, फटो माईणकाराक सकयल देंवोवपाचें व्हड संकश्ट आशिल्लें. कारण जे पद्दतीन तो झाडा मदीं आडकून उरिल्लो त्या झाडार चडून जवानांनी जिवाची पर्वा करिनासतना ताका सकयल देंवयलो. उजो पालोवपी दळाच्या एकूण इतिहासांतली ही विशेश अशी घडणूक आशिल्ल्याचें तांणी सांगलें. पूण ताका जिवदान दिवपाचें भाग्य दळाक मेळ्ळें. हे खातीर आदम खान, प्रदीप गांवकार, रामा नायक, रुपेश म्हाऊसकार ह्या दळाच्या जवानांनी खर कश्ट घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
