भांगरभूंय | प्रतिनिधी
ओम बिर्ला: हरिश्चंद्र नायक हांच्या घराचें लोकसभा अध्यक्षा हस्तुकीं उक्तावण
काणकोण: ज्या कुटुंबांत दिव्यांग भुरगीं, जाण्टो बापूय, दुयेंत आवय अशा कुटुंबान केन्ना घराचें सपन पळोवंक नाशिल्लें. त्या कुटुंबाक हक्काचें घर मेळ्ळें. तांचे सपन पुराय जालें. ही संकल्पना गोंयचे आमदार, लोकप्रतिनिधी आनी हेरांनी आपणावची अशें आवाहन लोकसभेचे सभापती ओम बिर्ला हांणी केलें.
बलराम चेरिटेबल फावंडेशना वतीन बांदिल्ल्या पासल भाटपालेचे हरिश्चंद्र नायक हांच्या घराचें फीत कापून आनी नांवतकट्याचें अनावरण केले उपरांत बिर्ला पत्रकारां कडेन उलयताले.
ह्या वेळार सभापती रमेश तवडकार, केंद्रीय राज्यमंत्री श्रीपाद नायक, आमदार गणेश गांवकार, भाजपाचे केंद्रीय सचीव व्ही. सतीश, सर्वानंद भगत, विशाल देसाय, आनंदू देसाय, सुनील पैंगीणकार, चंद्रकांत सुदीर, थळावे पंच महेश नायक आनी हेर मानेस्त हाजीर आशिल्ले.
प्रधानमंत्री नरेंद्र मोदी हांणी देशांत 3 कोटी परस चड बेघरांक घरां बांदून दिल्यांत. रमेश तवडकार हांणी एक रुपया आनी एक दीस श्रम ही संकल्पना राबोवन सी.एस.आर.च न्हय जाल्यार हेर दात्यांनी दिल्ले मजतीन हीं घरां बांदल्यांत. ते खातीर तवडकार अभिनंदनाक पात्र आसात अशें बिर्ला हांणी सांगलें.
ह्या वेळार उलयतना काणकोणचो खंयचोच मनीस फाटी उरचो न्हय. निमाण्या मनशा मेरेन विकास जावचो हें आपलें ध्येय आशिल्ल्याचें तवडकार हांणी सांगलें.
ह्या घराच्या सुवाळ्या वेळार वाड्या वयले शेजारी काणकोणच्या विवीध वाठारांतले नागरीक व्हड संख्येन हाजीर आशिल्ले. ह्या घरांत पंडित दीनदयाळ उपाध्याय, डॉ. श्यामाप्रसाद मुखर्जी, राष्ट्रपती द्रौपदी मुर्मू आनी प्रधानमंत्री नरेंद्र मोदी हांचे फोटे लायल्यात.
ज्या घरांत जोडपी एकूच चली सोडल्यार घरांतली परिस्थिती नाजूक आनी घरांतले चडशे लोक दुयेंती आसात. अशा कुटुंबाक बलराम चेरिटेबल फावंडेशना वतीन श्रमधाम ह्या संकल्पने खाला काणकोणचे आमदार आनी सभापती रमेश तवडकार हांणी घर बांदून दिलें. त्या घराचें ओम बिर्ला हांणी उक्तावण केल्ल्यान आयज म्हजो प्रभाग धन्य जाल्ल्याची प्रतिक्रिया थळावे पंच महेश नायक हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
