भांगरभूंय | प्रतिनिधी
बागायतीचें हजारांनी रुपयांचें केलें लुकसाण
फोंडें: शिगांव-कुळ्यां शशिकांत वेळीप हांचे बागायतींत गव्या रेड्यांनी खवदळ घालून हजारांनी रुपयांचें लुकसाण केलें. गव्यांनी रातच्या वेळार बागायतींत घुसून मिरसांग, केळी आनी माडयांचें लुकसाण केलें. कृशी खात्यान दखल घेवन लुकसाण भरपाय दिवपाची मागणी बागायतदार शशिकांत वेळीप हांणी केल्या.
कांय वर्सां पयलीं ऊसाची लागवड करपी शशिकांत वेळीप हांणी गव्या रेड्यांचो उपद्रव वाडिल्ल्यान मिरसांग, केळी आनी सुपारींची (माडयो) बागायती केल्ली. पूण सद्या गवे रेडे रातच्या वेळार बागायतींत घुसून लुकसाण करीत आशिल्ल्यान बागायती सोडपाची वेळ वाठारांतल्या शेतकारांचेर आयल्या.
फाटल्या कांय वर्सां सावन लागवड केले उपरांत गव्यांचो तशेंच माकडांचो उपद्रव सुरूच आसा. दोन-तीन दिसां पयलीं सुमार 10 परस चड गव्यांनी शशिकांत वेळीप हांचे बागायतींत घुसून लुकसाण केलें.
हे संबंदी अदीक म्हायती दितना शशिकांत वेळीप हांणी सरकार एके वटेन शेताक प्राधान्य दीत आशिल्ल्याची घोशणा करता. जाल्यार दुसरे वटेन रानटी जनावरांचो उपद्रव वाडिल्ल्यान शेतकारांक शेतांच नाका जाल्यांत. सरकारान हे विशीं गंभीरतायेन विचार करून शेतकारांक रानवटी जनावरांनी केल्ल्या लुकसाणीचो मोबदलो दिवपाची गरज आशिल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.