भांगरभूंय | प्रतिनिधी
म्हापशें: शापोरा जेटी कुशीक एका रॅस्टोरंण्टांत ड्रग्स विक्रीचो वेवसाय सुरू आशिल्ल्याच्या म्हायतीच्या आदारान हणजूण पुलिसांनी धाड घाली. ह्या वेळार कांय ड्रग्साचे घटक जप्त करून ते तपासणी खातीर प्रयोग शाळेंत धाडल्यात.
बुधवारा रातीं पुलिसांनी उडो बीच शिवोले धाड घालून दुबावीत सुरज तोडी आनी कालिदास (काली) नायक ह्या दोगांक अटक केल्ली. ह्या दोगांक शापोरा जेटी कुशीक हावस ऑफ शापोरा ह्या रॅस्टोरंण्टांत ड्रग्स तस्करीचो वेवसाय सुरू आशिल्ल्याची म्हायती चवकशे वेळार वयल्या दुबावितांनी उक्ती केल्ली.
ते प्रमाण शुक्रारा सांजवेळा पुलिसांनी पुलीस उपअधिक्षक जिवबा दळवी आनी निरिक्षक प्रशल नायक देसाय हांच्या फुडारपणा खाला, उपनिरिक्षक साहील वारंग, फॉरेन्सीक पंगडाचे कुलभूषण गुप्ता आनी वास घेवपी सुण्या सयत सदर रॅस्टोरं÷ण्टाचेर धाड घाली. ह्या वेळार ड्रग्साचे कांय घटक पुलिसांच्या हाताक लागले. हो सगलो म्हाल पुलिसांनी जप्त केलो.
जप्त केल्लो म्हाल फुडले चवकशे खातीर फॉरेन्सीक प्रयोग शाळेंत धाडून दितले आनी तो खंयच्या प्रकारचो आसा हाची तपासणी करतले. हो म्हाल ड्रग्स आशिल्ल्याचे तपासणींत उक्तें जाल्यार संबंदीत रॅस्टोरंण्ट धनी आनी वेवस्थापनाचेर गरजेची कारतले अशी म्हायती पुलीस उपअधिक्षक जिवबा दळवी हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
