भांगरभूंय | प्रतिनिधी
फाटल्या 50 वर्सां सावन रावपी लोक उदक, वीज जोडणेची पळयतात वाट
फोंडें: मडकय मतदारसंघांतल्या शापूर-बांदोड्यां 28 झोंपडपट्टींचो प्रलंबीत प्रस्न फुडारांत गंभीर जावपाची शक्यताय आसा. फाटल्या 40-50 वर्सां सावन झोंपड्यांनी रावपी लोकांक अजून मेरेन विजेची जोडणी दिल्ली ना. तशेंच तांकां एकूच नळाचें उदक वापरचें पडटा. सुवातेचो प्रस्न न्यायालयांत प्रलंबीत आशिल्ल्यान झोंपड्यांतल्या लोकांनी स्थलांतर करपाची मागणेची अजून मेरेन दखल घेतिल्ली ना. मतदानाचो अधिकार बजावपी झोंपडपट्टीतले लोक सरकाराच्या सहकार्याची अपेक्षा बाळगीत आसात.
वाठारांत आशिल्ल्या सैन्य दळाचे शिमरेशेर रावपी 28 झोंपडपट्टीतले लोक कितल्याशाच वर्सां सावन रावतात. आधार कार्ड, मतदान कार्ड, रेशन कार्ड आनी हेर गरजेचीं कागदपत्रां झोंपडपट्टींतल्या लोकांक दिल्यांत. पूण वीज आनी उदक जोडणे खातीर यत्न केल्यार न्यायालयांत प्रलंबीत आशिल्लो सुवातेचो प्रस्न मुखार येत आशिल्ल्यान मागणी अजून मेरेन पुराय जाल्ली ना. लागींच आशिल्ल्या सैन्य दळा वतीन लेगीत थळावे पंचायतीक पत्र धाडून झोंपड्टीतल्या लोकांचे थंय सावन स्थलांतर करचें अशी विनंती केल्ली. पूण अजून मेरेन वीज आनी नळाची जोडणी नाशिल्ल्या झोंपडपट्टींतल्या लोकांच्या प्रस्नाचेर गरजेचे उपाय काडिल्ले नात.
झोंपडपट्टींतल्या लोकांचें स्थलांतर करपाचो यत्न कांय वर्सां पयलीं बांदोडें पंचायतीन केल्लो. ते खातीर 2015 वर्सा पंचायती वतीन केल्ल्या सर्वेक्षणांत वट्ट 475 झोंपडपट्ट्यो कार्यरत आशिल्ल्याचें दिसून आयलें. तातूंतल्यो 28 झोंपड्यो सोडल्यार हेर सगल्या झोंपड्यांक वीज आनी उदकाची जोडणी दिल्या. दिसवड्यार काम करून उदरनिर्वाह करपी गोंया भायले लोक मतदानाचो हक्क बजायत आशिल्ल्यान स्थलांतराची मागणी करीत आसात.
साईदा नांवाचे एके बायलेन दिल्ले म्हायती प्रमाण वाठारांत 28 मदल्या अर्द्या झोंपड्यांनी लोक रावतात. उरिल्ले कांय जाण हेर कडेन स्थलांतर जाल्यात. सद्या वीज आनी नळ जोडणे बगर रावपी लोकांचो वापर फक्त मतदान करपा खातीर जाता. पूण स्थलांतर करपाचो विचार अजून मेरेन कोणेच केल्लो ना. हाचे पयलीं लोकांक स्थलांतर करपाची मागणी पंचायती कडेन केल्ली. पूण अजून मेरेन ताची घेतिल्ली ना. वीज नाशिल्ल्यान दीसपट्टे जिणेंत खूबशो अडचणी येत आसात. तातूंत गरमेच्या दिसांनी दर वर्सां लोकांचे हाल जायत आशिल्ल्याचें सांगलें.
आदले सरपंच राजेश नायक हांणी हाचे पयलीं 28 झोंपडपट्टींतल्या लोकांचे स्थलांतर करपाचो विचार केल्लो. लागींच आशिल्ल्या 87 हजार चौखण मिटर सरकारी सुवातेंत 500 चौखण मिटर सुवात ह्या लोकांक दिवन तांचें स्थलांतर करपाचो निर्णय जाल्लो. पूण उपरांत अदीक सोपस्कार पुराय करूंक नात. झोंपडपट्टेतले लोक वीज जोडणी नाशिल्ल्यान खूबशा अडचणींचेर मात करीत आसात. ताका लागून ह्या लोकांचे स्थलांतर करपाचो प्रस्न जावंक जाय आशिल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
