भांगरभूंय | प्रतिनिधी
उल्हास तुयेंकार: रावणफोंडार भलायकी शिबिराक बरो प्रतिसाद
मडगांव: सद्याचे धांवपळीचे जिणेंत मनशाक वेळ मेळना. ताका लागून व्यायामा कडेन आडनदर जाता. हाका लागून भलायकेच्यो विवीध समस्या उप्रासतात. ते खातीर दरेकान सकाळीं वा सांजवेळा थोडो वेळ काडून वॉकींग वा हेर व्यायाम करचे आनी भलायकी बरी राखची अशें आवाहन आमदार उल्हास तुयेंकार हांणी केलें.
रावणफोंडचे पंच साईश राजाध्यक्ष हांणी प्रभागांतल्या लोकां खातीर भलायकी शिबिराचें आयोजन नावेली भलायकी केंद्राच्या सहकार्यांतल्यान केल्लें. ताचें उक्तावण आमदार उल्हास तुयेंकार हांचे हस्तुकीं जालें. जिल्हो पंचायत वांगडी परेश नायक, पंच साईश राजाध्यक्ष हांचे सयत प्रभागांतले नागरीक ह्या वेळार हाजीर आशिल्ले. ह्या वेळार प्रभागांतल्यो बालवाडीच्यो शिक्षिका माया मोरजकार हांचो भोवमान केलो.
डॉ. कामुलकार हांणी सांगलें, रक्तदाब, गोडेंमूत, काळजाचें दुयेंस हांकां लागून खूबशे जाण त्रस्त आशिल्ल्याचें सद्या दिसून येता. खूबशा जाणांक आपल्याक दुयेंस जालां हाची कल्पनाच नासता. ताका लागून अशे तरेच्या शिबिराचो फायदो घेवन लोकांनी तपासणी करून घेतल्यार तांचेर वेळारूव उपचार सुरू करूंक येतले. दुयेंतीक जाल्ल्या दुयेंसाची म्हायती मुळावे अवस्थेंत कळत जाल्यार फुडले उपचार करप सोंपें जाता.
रक्ताची चांचणी, हिमोग्लोबीन चांचणी अशा विवीध चांचण्यांतल्यान खूबशा जाणांक जाल्ल्या दुयेंसाची म्हायती मेळटा आनी वखद विरसद सुरू करूं येता, आनी हाका लागून फुडलो धोको टाळूं येता. ह्या शिबिरांत थानाच्या क्रांक दुयेंसाची तपासणी करतात. अशे तरेचीं शिबिरां विवीध वाठारांनी सुरू आसात. लोकांनी हाचो फायदो करून घेवचो अशेंय डॉ. कामुलकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
