भांगरभूंय | प्रतिनिधी
दोगां बावन्सरांक अटक, एकलो फरार
म्हापशें: आसगांवां सोरो क्लबांत वॉशरूम वापरपाच्या कारणा वयल्यान पुणेंच्या पर्यटकांचेर क्लबाच्या बावन्सरां कडल्यान खुनी हल्ल्याचो प्रकार घडलो. ह्या प्रकरणांत हणजूण पुलिसांनी सोहन पाल आनी मंजूनाथ नायक (वेर्ला-बार्देस) ह्या दोगां दुबावितांक अटक केली. जाल्यार एच. डिकॉस्टा (रा. बस्तोडें) हो बावन्सर फरारी आसा.
ही घडणूक आयतारा (8 वेर) फातांडेर 3.30 ते 4 वरां मजगतीं घडली. पुणेंचे तीन तरणाटे आनी एक तरणाटी असो चार पर्यटकांचो गट वयल्या क्लबांत शेनवारा 7 वेर मध्यान रातीं गेल्लो.
वयल्या वेळार ह्या गटांतलो कागाळदार नितेश खर्र हो क्लबांतल्या वॉशरुमांत वचपा खातीर गेलो. त्या वेळार क्लबाच्या बावन्सरांनी ताका आडायलो. हाचे वयल्यान तांचे मदीं वाद जालो. कागाळदाराचे मजतीक ताचे तिनूय वांगडी धांवून आयले. ह्या वेळार दुबावितांनी ह्या पर्यटकां कडेन मारपेट केली. तशेंच एका दुबावितान कागाळदाराचेर सोऱ्याचे बाटलेन हल्लो केलो.
ह्या हल्ल्यात तो गंभीर जखमी जालो. तशेंच दुबावितांच्या मारपेटींत ताचे इश्ट, इश्टीण किरकोळ जखमी जाले. जखमींक रोखडेच हॉस्पिटलांत दाखल केले. किरकोळ जखमी जाल्ल्यांक त्याच दिसा डिस्चार्ज दिलो. जाल्यार कागाळदार नितेश खर्र हाका सोमारा डिस्चार्ज दिलो. उपरांत हे सगले पर्यटक पुण्यां गेले.
ह्या प्रकरणांत पुलिसांनी भादंसंच्या 307 आनी 323 कलमा खाला गुन्यांव दाखल केला आनी वयल्या दुबावीत बावन्सरांक अटक केली. जाल्यार एच. डिकॉस्टा हो दुबावीत आरोपी फरारी आसून ताचो सोद पुलीस घेतात. दोनूय दुबावितांक तीन दिसांची पुलीस कोठी न्यायालयान दिल्या. फुडलो तपास पुलीस उपनिरिक्षक साहील वारंग करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
