भांगरभूंय | प्रतिनिधी
पणजी, प्रतिनिधी : पोरणें गोंय पुलिसांनी गुन्यांवकार विशाल गोलतकार हांच्या खून प्रकरणांत ४० साक्षिदारांच्यो साक्षी नोंद करून ४१९ पानांचें आरोपपत्र पणजेच्या पयलो वर्ग न्यायालयांत दाखल केलां.
गोलतकार हांची कूड १६ जुलयाक मेरशेच्या अपना घरा लागसारच्या झोपांत मेळिल्ली. पोरणें गोंय पुलिसांनी साई कुंडयकार, तुषार कुंडयकार ह्या भावां सयत ओंकार च्यारी, गौरेश गांवस आनी अमेय वळवयकार ह्या पांच जाणांक ह्या प्रकरणांत अटक केल्ली. तशेंच एका सान भुरग्याक ताब्यांत घेतिल्लो. ताका मेरशेच्या अपना घरांत दवरिल्लो. अटक केल्ल्या पांच जाणांक सुरवातेक पांच दिसांची पुलीस कादय दिल्ली. उपरांत न्यायालयीन कस्टडींत दवरिल्ले. ओंकार च्यारीक न्यायालयान जामीन मंजूर केल्लो. उपरांत गोरेश, अमेय आनी तुषारान जामीना खातीर अर्ज केल्लो.
मजगतीं, ह्या प्रकरणांत दुबावीत साई सोडून हेर चार जाणांनी पणजेच्या उत्तर गोंय जिल्हो आनी सत्र न्यायालयांत जामीन अर्ज दाखल केल्या उपरांत न्यायालयान तांकां सशर्त जामीन मंजूर केला. साईक आजूनय जामीन मेळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
