भांगरभूंय | प्रतिनिधी
सगल्यांत उणें जेनिफर मोंसेरात हांचे दोन; वट्ट प्रस्न 2,029
पणजी: आठव्या विधानसभेचें अधिवेशन शुक्रारा सोंपलें. ह्या अधिवेशनांत तारांकीत आनी अतारांकीत मेळून सुमार 2,029 प्रस्न विचारले. हातूंत सगल्यांत चड बाणावलीचे आमदार वेंझी व्हिएगश हांणी 172 जाल्यार सगल्यांत उणे दोन प्रस्न ताळगांवच्यो आमदार जेनिफर मोंसेरात हांणी दाखल केल्ले. हाचे बगर सगल्यांत चड प्रस्न 123 गृह जाल्यार सगल्यांत उणो एकूच प्रस्न निर्वासीत मालमत्ता ह्या खात्या विशीं विचारिल्ल्याची म्हायती मुखार आयल्या.
आठव्या विधानसभेचें दुसऱ्या सत्राचें 10 दिसांचें अधिवेशन 11 जुलयाक सुरू जावन तें 22 जुलयाक सोंपलें. ह्या काळांत सुमार 460 तारांकीत आनी 1,569 अतारांकीत मेळून 2,029 प्रस्न विचारले. हातूंत सगल्यांत चड 172 प्रस्न बाणावलीचे आमदार वेंझी व्हिएगश हांणी दाखल केल्ले.
ताचे उपरांत मडगांवचे आमदार दिगंबर कामत हांणी 171, कुंकळ्ळीचे आमदार युरी आलेमांवान 160, फातोड्डेंचे आमदार विजय सरदेसाय आनी कळंगूटचे आमदार मायकल लोबो हांणी दरेकी 153, सांता क्रुझचे आमदार रुडोल्फ फर्नांडीस 144, सांत आंद्रेंचे आमदार विरेश बोरकार 135, वेळ्ळीचे आमदार क्रुझ सिल्वा 134, कुडटरीचे आमदार रेजिनाल्ड लोरेन्स 117, मुरगांवचे आमदार संकल्प आमोणकार 107, कुठाळ्ळीचे आमदार आंतोनियो वाझ 97, हळदोणेंचे आमदार कार्लुस फेरेरा 75, दिवचलचे आमदार चंद्रकांत शेट्ये 74, शिवोलीच्यो आमदार डेलियाला लोबो 67, केपेंचे आमादार एल्टोन डिकोस्टा 48, पर्येंच्यो आमदार दिव्या राणे 41, पेडणेंचे आमदार प्रवीण आर्लेंकार 36, साळगांवचे आमदार केदार नायक 35, मांद्रेंचे आमदार जीत आरोलकार 31, वास्कोचे आमदार 24, कुमारजुंवेंचे आमादार राजेश फळदेसाय 18, म्हापशेंचे आमदार ज्योशुआ डिसोझा 12, मयेंचे आमदार प्रेमेंद्र शेट 8, नावेलीचे आमदार उल्हास तुयेंकार 7, सांवड्डेंचे आमदार गणेश गांवकार आनी नुवेंचे आमदार आलेक्स सिक्वेरा हांणी दरेकी चार, जाल्यार ताळगांवच्यो आमदार जेनिफर मांसेरात हांणी फक्त दोन प्रस्न विधानसभेंत दाखल केल्ल्याची म्हायती मुखार आयल्या.
हाचे बगर सगल्यांत चड तारांकीत प्रस्न 40 भौशीक बांदकाम खात्यांत दाखल केले. तेच बरोबर खात्यां मदीं सगल्यांत चड प्रस्न 123 गृह खात्यांत दाखल केल्ले. उपरांत भौशीक बांदकाम खात्यांत 109, भलायकी खात्यांत 99, पर्यटन खात्यांत 82, पंचायत आनी शिक्षण खात्यांत दरेकी 73, महसूल खात्यांत 74, वीज खात्यात 64, महिला आनी बाल कल्याण खात्यांत 63, येरादारी, उद्देग आनी नगर नियोजन खात्यांत दरेकी 62, अर्थ खात्यांत 53 जाल्यार हेर मेळून 61 खात्या संदर्भांत आमदारांनी प्रस्न दाखल केल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
