भांगरभूंय | प्रतिनिधी
दिसाळीं छापपाचो कागद म्हारग जालो, जायराती उण्यो जाल्यो तरी नव्या दिसाळ्यांचें युग थांबना. राजकी, सरकारी, उद्येजकांच्या बळाचेर सातोळीं, म्हयनाळीं, पंद्रसाळीं आयजय छापतात. प्रुडंट मिडियाचें मिशन डिजिटल जैतीवंत जावचें अशें आंवडेतना मिडियांतल्यांक एक ग्रुप म्हणून वावर करपाची संद मेळ्ळ्या. कवी, लेखकांक, पत्रां बरोवप्यांक आपले विचार मांडपाची एक माची ते वरवीं आसतली. घटनेक, संहितेक पाळो दिवन मेकळेपणान विचारधन समेस्तां मेरेन पावोवपाचें स्वातंत्र्य सगल्यांक आसा. आशिल्ल्या स्वातंत्र्याचो वायट उपेग न करपाचो सोपूत नव्या युगांत घेवचो पडटलो.
प्रुडंट आकाशवाणी जायत व्हय? आकाशवाणी वयल्यान निवृत्त जाल्ले अधिकारी, लेखक मुकेश थळी एका शिंवाक दिसाळ्यांनी दोन भासांनी मांडटात. फुडारांत तिसरे भाशेंतल्यान शींव वयर सकयल धांवत प्रुडंट कित्याक जावचो न्हय? वाग, शींव, माकड, गाय, म्हस, गाढवाचे काणयेंतल्यान तुमच्या आमच्या मनांतले उमाळे समेस्तांक सांगात. समेस्तां भितर राजकारणीय आसतले, प्रुडंटाचे माचयेक तांचो तेंको उरचो, अचूक उतरांनी खबरो दिवपी खबरांकार, संपादकांक ते माचयेचो लाव मेळचो.
लाडू, काळगांचे काणयेंतल्यान विधानसभेक वाट दाखोवपी आदले मुख्यमंत्री मनोहर पर्रीकार आमचे मदीं नात. तांणी जैतीवंतांक बळगें दिलें, लोणचें, पापडांकय पालव दिलो. व्हड उद्येग नासले तरी शिका, शिकयात, चार पयशे जोडात, स्वयंपूर्ण जायात ही येवजणय तांच्याच तेंपा वयली. ते येवजणेंतल्यान प्रशिक्षण घेवप्यांक आयदनां आयजय मेळटात. पत्रकारांक उद्येगांच्यो पत्रकार परिशदो आयदनां इतल्योच जायरातीं खातीर उपेगाच्यो. दिसाळ्यांचे जायरात, वितरण, मनीसबळ विभाग इलॅक्ट्रॉनीक माध्यांतल्यान बळिश्ट जाल्यात. हे वटेन ते वटेन वचपाक, धांवपाक ती यंत्रणाय उणी पडटा तेन्ना मोबायला वयल्यान एक मॅसेज धाडात. वॉट्सअॅपा वयल्यान दिसाळ्यांतल्या विचारांक चंद्रार पावयल्यार? साडेतीन दसकांचे पत्रकारितेंत विधानसभेच्यो खबरोय वॉट्स अॅपाचेर धाडपाक तुमी आमी शिकल्यात. फुडले पिळगे मेरेन तें गिन्यान पावयतना, नवे खबरांकार आपयतना तांचें तंत्रीक गिन्यानय परिक्षेंतल्यान तपासचें. दिसाळीं, पुस्तकां वाचात, सत सांगात, कमीत कमी उतरांनी, जोड दिवपी नागरीक, सिनियर्स आसात हें तरनाट्यांक कळयात.
सकारात्मकतेचो संदेश (बंगाली गोडशें न्हय) विज्ञानीक, हळदीचें पेटण्ट भारताक मेळोवन दिवपी डॉ. रघुनाथ माशेलकार हांचोय. हळदीचें पेटण्टींग करतकच ते गोंयांत आयिल्ले. गोंय श्रमीक पत्रकार संघटनेन तांचे कडेन खासा पत्रकारां खातीर भासाभासेची कार्यावळ केल्ली. तसल्या कार्यावळींक वेळ आसा कोणाक? आतां फकत धांवप, बायट्सां खातीर. दिसभर त्यो बदलतात, एक बायट मारुतीचे शेंपडे वरी वाडटा, गुज वांगड्यांचे वळेरेचेंय तेंच. पांवडो कितें? मोल कोणाक? तालुको पांवड्या वयल्यान पणजी आनी राजभवनांतल्या दरबार हॉला मेरेन पावतल्यांक. वळख आसली तरी कोणाकय घुरी घालपाक मेळना राजभवनाचेर, राखणे वेवस्था दिसान दीस कडक जाता. दोरी बांदल्यार ती तोडपाची, ओडपाची, बोवाळ घालपाची धिटाय आशिल्ले कितले आसात? राखणे खातीर जाकिटां घालीं म्हणून जावचीं नात, चारय कोनशांनी पळोवपाचें शिक्षण दिवपीय ना. वातावरणाचेर बातम्यो करपाचें शिक्षण पत्रकार सुरेश स. नाईक हांणी आमकां दिलें. हातांत पेन, पेन्सील, मोबायल, कागदय नासता तेन्ना तुमचे दोळे होच कॅमेरा. यादींतले खीण सांगपी
चौकटींकय बुराक पडटात हें मतींत दवरात.
म्होंवाळ उतरांनी बरोवन, सांगून, वाचप्यांक प्रस्न विचारून अभिव्यक्ती स्वातंत्र्य तिगोवप शक्य आसा. चित्रां, व्यंगचित्रां काडटना सांबाळ्ळ्यार, जतनाय घेतल्यार उडप कठीण न्हय. उडटनाय कुल्ले वरी एकामेकांचे पांय ओडपी, मोडपी आसतले पूण तुमी फुडें वचात अशें सांगपीय आसात. धना परस मांडिल्ले मोडिल्ल्या वेळार पोरणे विचारय भोवमान हाडटात. त्या विचारांक, विचारशक्तींक सलाम करतना नवे वाटेर चलचें पडटलें, सगलेंच नवें ताल्ल जावपाक जाय अशें न्हय.
राष्ट्रपिता महात्मा गांधी, चाचा नेहरु, राजीव गांधी हांच्या पोरण्या फोटों कडेन पळेल्यार विचारांचें म्हत्व कळटा. मुळावे फोटो, भास, विचार उखलापे नासतात, दिसाळ्यांच्या सर्तीच्या संवसारांत तेच तिगतात. जेन्ना तेच एक दीस एकी कडेन आनी दुसरे दीस दुसरी कडेन भास बदलून छापतात तेन्ना ते शेळे जातात. विचारधनाच्या कणांचो शिंवर करतना नितीशास्त्राक पाळो दिवया.
दिसाळ्यांचे बदलिल्लें नितीशास्त्र, नेमावळ हेर माध्यमां खातीर वापरपाचेर अभ्यास करुया.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
