भांगरभूंय | प्रतिनिधी
रस्त्यारूच दवरलीं कदेलां; वाठारांत घाणीचें साम्राज्य
वास्को: वास्को रेल्वे स्टेशना मुखार विवीध खाद्यपदार्थ विकपी विक्रेत्यांनी परतून रस्त्यार अतिक्रमण करून रस्त्यारूच कदेलां दवरिल्ल्यान तशेंच घाणयारें उदक उडोवन थंयचो वाठार घाण करून उडयला. पूण मुरगांव पालिका कारवाय करपा कडेन आडनदर करीत आशिल्ल्यान वास्कोकारांच्यो विवीध प्रतिक्रिया व्यक्त जायत आसात. हाचे पयलीं कारवाय करतना नगराध्यक्ष तशेंच अन्न आनी वखदां प्रशासनाच्या अधिकार्यांनी आमी हाचे मुखार अशे प्रकार खपोवन घेवचे नात अशें जें सांगिल्लें, ताचो तांकां विसर पडला काय कितें असो प्रस्न वास्कोकार विचारतात.
वास्कोे रेल्ले स्टेशना मुखा वयले सुवातेर ऑम्लेट पाव, च्या, विवीध प्रकारचीं शितपेयां, फास्ट फूड आनी हेर पदार्थ विकपी गाडे आसात. ह्या गाडेकारांचे हातगाडे उबे करपा खातीर मुरगांव पालिकेन फलाट बांदून दिल्लो. पूण ह्या हातगाडेकारांनी थंयचो फुटपाथ आनी रस्त्यार अतिक्रमण करून थंय कदेलां मांडून एक प्रकारान हॉटेलूच सुरू केलां. पयलीं हें हातगाडे सांजवेळा घरा कडल्यान हाडटले आनी सकाळीं परतून घरा व्हरताले. पूण आतां मुरगांव पालिकेच्या आशिर्वादान ते हातगाडे थंयच थिरावल्यात.
मदेकांत मुगांव पालिकेक जाग आयले उपरांत कांय जाणांचेर कारवाय केल्ली. तांकां फुटपाथ आनी रस्तो मेकळो दवरपाक सांगिल्लें. तशेंच अन्न आनी वखदां प्रशासनाच्या अधिकारी वर्गान थंयचे सुवातेची आनी उक्तडार दवरिल्ल्या अन्न पदार्थांची तपासणी केल्ली. त्या वेळार कांय जाणांक शिटकावणी दिल्ली. उपरांत दुसरे फावटी तपासणी करतना कांय जाणां आड कारवाय केल्ली. कांय जाणांच्यो वस्तू, खाद्यपदार्थ जप्त केल्ले. एक गाडो जप्त केल्लो. त्या वेळार मुरगांवचे नगराध्यक्ष लिओ रॉड्रिगीश हांणी हाचे मुखार असले प्रकार खपोवन घेवचे नात अशें सांगून शिटकावणी दिल्ली. पूण उपरांत पुला सकयल्यान खूबशे उदक व्हांवून गेलें.
आतां त्या विक्रेत्यांनी परतून फुटपाथ, रस्त्यार अतिक्रमण करून कदेलां मांडल्यात. थंय परतून घाण पातळ्ळ्या. थंयच्या रस्त्यारूच कदेलां मांडिल्ल्यान रस्त्याचे कुशीक वाहनां पार्क करपाक विक्रेते विरोध करतात. थंयचें अतिक्रमण आनी गलिच्छपणा प्रकरणांत मुरगांव पालिकेचे अधिकारी आनी हेरांक कल्पना दिल्ली. पूण ते कारवाय करपाचे नांव घेनात. हाचे फाटल्यान कसलें अर्थकारण आसा हें समजुपाक मार्ग ना. हे हातगाडे वास्को रेल्वे स्टेशना मुखार आशिल्ल्यान गोंया भायल्या पर्यटकांचे पयलीं नदरेक पडटात. ताका लागून वास्को शाराचे प्रतिमेक दाग पडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
