भांगरभूंय | प्रतिनिधी
रेल्वे पुलिसांची कारवाय; सोऱ्याचें मोल 14,550
वास्को: वास्को रेल्वे स्टेशना वयल्यान सुटपी शालिमार एक्सप्रेस पॅसेंजर रेल्वेच्या एका डब्यांत बेवारशी स्थितींत तीन बॅगांनी सांपडिल्ल्यो सोऱ्याच्यो बाटल्यो वास्को रेल्वे पुलिसांनी जप्त केल्यात. ह्या सोऱ्याच्या बाटल्यांचें मोल 14 हजार 550 रुपया आसा. जप्त केल्ल्यो बाटल्यो अबकारी खात्याच्या वास्को विभागा कडेन दिल्यात.
वास्को रेल्वे स्टेशना वयल्यान मंगळारा सकाळीं अस्तंत बंगालांत वचपी शालिमार एक्सप्रेस पॅसेंजर रेल्वे सुट्टा. ती सुटचे पयलीं वास्को रेल्वे पुलीस सदचे प्रमाण दरेक डब्याची तपासणी करीत भोंवताले. त्या वेळार तांकां एका डब्यांत दोन हँडबॅग आनी एक ट्रॉलीबॅग नदरेक पडली. त्या बॅगांनी सोऱ्याच्यो बाटल्यो आशिल्ल्यो.
ह्या प्रकरणांत प्रवाशां कडेन चवकशी केली तेन्ना त्या बॅगांचेर मालकी हक्क सांगपाक कोणूच मुखार आयलो ना. ताका लागून तीं बॅगां ताब्यांत घेतलीं. त्या बॅगांनी दरेकी 750 मिलिच्यो 105 रियल व्हिस्किच्यो बाटल्यो आनी दरेकी दोन लिटराच्यो पांच रॉयल चॅलेंज व्हिस्किच्यो बाटल्यो मेळ्ळ्यो.
ही कारवाय पुलीस उपनिरिक्षक यशवंत मांद्रेंकार हांच्या मार्गदर्शना खाला हवालदार श्रद्धा नायक, एचबी शिवानंद, किशार मोरे हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
