भांगरभूंय | प्रतिनिधी
रांदची कूड, बेडरूम लासून गोबर
मुरगांव: इस्लामपूर बायणांत फ्रिजाच्या शॉर्टसर्किटाक लागून घराक उजो लागून रांदची कूड आनी बेडरूम लासून गोबर जालो. ही घडणूक काल (आयतारा) सांजवेळा 5 वरांचेर घडली.
इस्लामपूरच्या एका घरांतल्या तीन कुडींनी भाडेकार रावतात. तातूंत अमिना बी ही बायल आयतारा आपली कूड बंद करून कामा निमतान भायर गेल्ली. त्या घरा मुखार कांय ल्हान भुरगीं खेळत आसतना तांकां अमिना बी हिचे कुडींतल्या पाख्यांतल्यान धुंवर येत आशिल्ल्याचें दिसून येतकूच बोवाळ घाल्ल्यान आशिकुशीचे लोक धांवून आयले.
मजगतीं, कुडीक कुलप आशिल्ल्यान भितर वचूंक मेळना जालें. ताका लागून एका रहिवाशान कुलप तोडलें. उपरांत थंयच्या तरणाट्यांनी ते कुडीत आशिल्ले दोन गॅस सिलिंडर पयली भायर काडले. तांणी उदकाचो मारो सुरू करून उजो पालोवपाचो यत्न केलो. पूण उज्यान पेट घेतिल्ल्यान तो नियंत्रणांत येना जालो.
ह्या वेळार थंय पाविल्ल्या उजो पालोवपी दळाच्या जवानांनी उजो पालयलो. तो मेरेन रांदची कूड आनी बेडरूम उज्यांत लासून गोबर जातलो. हो उजो फ्रिजाच्या शॉर्टसर्किटाक लागून लागिल्ल्याचें सांगलें. ह्या उज्यांत पाखें लासून गेलें.
मजगतीं, थंयचो रस्तो अशीर आशिल्ल्यान तशेंच रस्त्याच्या दोनूय वटांनी वाहनां उबीं करीत आशिल्ल्यान दळाचो बंब थंय पावपाक अडचण निर्माण जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
