भांगरभूंय | प्रतिनिधी
कृष्णा साळकारः बांदकामाची केली नगराध्यक्षा सयत पळोवणी
वास्को, प्रतिनिधी : वास्कोच्या नुस्तें मार्केटाचें काम डिसेंबर मेरेन पुराय जातलें, अशी आस्त आसा. हे प्रकल्प लेगीत रोखडेच मार्गाक लागतले. स्वातंत्र्यपथा वयल्या भुंयगत वीज केबलाचें काम सुरू जालां. ताका लागून दिवाळेक नरकासूर सर्ती वेळार त्या मार्गा वयल्या खांब्या वयल्यान आडव्यो तिडव्यो सरयो गेल्ल्यो दिसच्यो नात, अशें वास्कोचे आमदार कृष्णा साळकार हांणी सांगलें.
आमदार साळकार हांणी मुरगांवचे नगराध्यक्ष गिरीश बोरकार तशेंच नुस्तें विक्रेत्यांचे प्रतिनिधी, कंत्राटदार, सल्लागार हांचे सयत नुस्तें मार्केटाच्या बांदकामाची पळोवणी केली.
ह्या वेळार आमदारान नुस्तें विक्रेत्यांक थंय कसल्यो सोयी सुविधा जाय, हे विशीं चर्चा केली. नुस्तें विक्रेत्यांच्या प्रतिनिधींनी जर तश्यो अडचणी नदरेक हाडून दिल्यार त्यो पयस करतले, अशें तांणी आस्वासन दिलें. नुस्तें मार्केट बांदतना विक्रेते, गिरायक हांचे प्रस्न आमी नदरे मुखार दवरल्यात, अशेंय तांणी सांगलें.
बांदिल्ल्या ओट्याक लागून नुस्तें विक्रेत्यांक कांय समस्या निर्माण जावं येता. हे खातीर ओट्यांची लांबाय चड दवरची, अशी मागणी नुस्तें विक्रेत्यांनी केल्या. तशेंच 300 नुस्तें विक्रेत्यां बदला 250 विक्रेत्यांची थंय वेवस्था करची, अशीय सुचोवणी नुस्तें विक्रेत्यांनी केल्या. तांची मागणी आनी सुचोवणी मानून घेतल्यात, अशें साळकार हांणी सांगलें.
मार्केट सुरू जाले उपरांत मार्केटाचे वाटेर कोणेच नुस्तें विक्री करची न्हय, अशी विनवणी साळकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
