भांगरभूंय | प्रतिनिधी
जखमी गाये विशीं लोकांनी उक्तायलें चुरचुरें
वास्को: वरुणापुरी-शांतीनगर म्हामार्गार एका वाहनाचो गायेक धपको बशिल्ल्यान जखमी जाल्ले गाये विशीं चुरचुरें उक्तायतना संबंदीत गायेच्या धनया आड मुरगांव पालिका कारवाय कित्याक करिना असो प्रस्नूय उपस्थीत केलो. मुरगांव पालिकेन फाटल्या कांय म्हयन्यांत पालिका वाठारांतल्या चडशा हेडग्या गोरवांक धरून गोशाळेंत धाडलीं. पूण वरुणापुरी-शांतीनगर म्हामार्गार अजून हेडगीं गोरवां दिसतात.
हीं गोरवां रस्त्यार उबीं रावत आशिल्ल्यान एखाद्या वाहनाचो धपको बसून जखमी जातात. ह्या प्रकरणांत मुरगांव पालिकेन दखल घेवन संबंदीत हेडग्या गोरवांक धरून व्हरपाची वेवस्था करची अशी प्रतिक्रिया लोकांनी उक्तायली.
हांगासरल्या हेडग्या गोरवांचो प्रस्न वयर सरिल्ल्यान वास्कोचे आमदार कृष्णा साळकार हांणी दखल घेतिल्ली. तांच्या पालवान मुरगांव पालिकेन एका गोशाळे कडेन समजिकायेची कबलात केली. उपरांत मुरगांव पालिका वाठारांतली सुमार 200 ते 250 हेडगीं गोरवां संबंदीत गोशाळेन धरून व्हेल्लीं. ताका लागून नागरीक, वाहन चालक हांणी समाधान उक्तायिल्लें.
पूण हालींच मांगोरहील वाठारांत कांय हेडगीं गाेरवां नदरेक पडूंक लागिल्ल्यान लोकांनी अजाप उक्तायिल्लें. ह्या हेडग्या गोरवांच्या कानाक टॅग लायिल्ले दिसून येताले. ताका लागून हे संबंदी आवाज उठयिल्ल्यान मुरगांव पालिकेन ह्या गोशाळेच्या संबंदितांक म्हायती दिल्ली. उपरांत त्या हेडग्या गोरवांक धरून व्हेली. तरी लेगीत शांतीनगर-वरुणापुरी मार्गार अजुनूय हेडगीं गोरवां दिसून येतात.
ह्या मार्गार कांय जाणांचे गोठे आसात. संबंदीत दूद काडले उपरांत गायांक चरपा खातीर रस्त्यार सोडटात. हीं गोरवां रस्तो दुभाजकांतलें तण, झोंपा खातना दिसतात. केन्ना केन्ना रस्तो हुपतना गोरवां अपघातांत सांपडटात. ही मोनजात जखमी जाले उपरांत चुरचुरे उक्तायतात. पूण तांच्या धनया आड कोणूच कारवाय करिनात.
दोन दिसां पयलीं एके गायेक वाहनाचो धपको बशिल्ल्यान ती जखमी जाली. ह्या प्रकरणांत गोरवां वैजक आनी गोरवां सांबाळ खात्याच्या कर्मचाऱ्यांनी थंय वचून उपचार केले. ते गायेच्या फुडल्या पांयाक जखम जाल्ल्यान ती थंयच पडून उरली. हे घडणुके उपरांतूय त्यार रस्त्यार अजुनूय हेडगीं गोरवां रस्तो दुभाजकांत चरतना दिसून येतात. ह्या प्रकरणांत त्या गोरवांच्या धनया आड मुरगांव पालिका केन्ना कारवाय करतली हाचे कडेन लोकांचे लक्ष लागून आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
