भांगरभूंय | प्रतिनिधी
आमदार कृष्णा साळकार हांणी केली पळोवणी; 9 म्हयन्यांत काम पुराय
वास्को: शार वाठारांतल्यान भायर वचपा खातीर अतिरिक्त रस्त्याची गरज आशिल्ल्यान एफएल गोम्स मार्गार रोखडीच ‘अप रॅम्प’ बांदपाचें काम सुरू करतले अशें वास्कोचे आमदार कृष्णा साळकार हांणी सांगलें. येता त्या कांय दिसा भितर हें काम सुरू जातलें आनी तें णव म्हयन्यां भितर पुराय जातलें. ह्या वेळार एफएल गोम्स मार्गा वयली येरादारी स्वातंत्र्य पथान वळयतले. ताका लागून वाहनचालकांक कांय काळ गैरसोयीक सामकार वचचें पडटलें हाची म्हाका जाणीव आसा. पूण तांणी थोडी कळ सोंसून योग्य तें सहकार्य करचें अशें आवाहन साळकार हांणी केलें.
वरुणापुरी-बायणा उड्डाण पूल, सडा मार्गान चारपदरी म्हामार्ग मुरगांव बंदरा मेरेन व्हेला. पूण बायणा रवींद्र भवन ते मुरगांव बंदराचो णव क्रमांकाचो धक्को ह्या दरम्यान उड्डाण पुलाचें काम अजून पुराय जाल्लें ना. रेल्वे मार्गा वयल्यान हो पूल वचत आशिल्ल्यान थंय कांय अडचणी निर्माण जाल्ल्यो. त्यो आतां पयस केल्ल्यान काम सुरू जालां.
वेर्णा-दाबोळी सावन वरुणापुरी म्हामार्गान येवपी वाहनांक शार वाठारांत येवपा खातीर बायणा रवींद्र भवना सामकार एक फांटो बांदपाचें काम सुरू आसा. ताका लागून तीं वाहनां बायणांत देंवून शार वाठारांत येतली. मजगतीं, शार वाठारांतल्यान उड्डाण पुलार वचपा खातीर ‘अप रॅम्प’ ची गरज आशिल्ली. ते संबंदी नेमकी सुवात मेळोवपा खातीर पळोवणी केली. फाटले खेपे भौशीक बांदकाम खातें, राष्ट्रीय म्हामार्ग प्राधिकरण, गॅमन कंपनी, येरादारी खातें, येरादारी पुलीस हांचे बरोबर आमदार साळकार हांणी पळोवणी करून निमाणो निर्णय घेतिल्लो. ते प्रमाण काम सुरू जातलें.
मजगतीं, मंगळारा तांणी भौशीक बांदकाम खात्याचे मुखेल अभियंते उत्तम पार्सेकार हांचे सयत ते सुवातेची परतून पळोवणी केली. हे पळोवणे उपरांत थंय ‘अप रॅम्प’चें काम सुरू करपाचो निर्णय घेतला.
शार वाठारांतल्यान भायर वचपा खातीर अतिरिक्त रस्त्याची गरज आसा. सद्या शारा भायर वचपा खातीर चिखलीच्या रस्त्याचो वापर करतात. शारा भायर वचपा खातीर आनीक आलायते रस्ते आसचे हे खातीर आपणे यत्न सुरू केल्यात. आपणें तानिया हॉटेला मुखा वयल्या रेल्वे उड्डाण पुलाची उंची वाडोवपा खातीर यत्न केल्ले. त्या यत्नांक येस आयलां. थंय पुलांची उंचाय वाडयतले. त्या पुला सकयल्या रस्त्याचो वापर शार वाठारा भायर वचपा खातीर सगल्या वाहनांक आपत्कालीन करूं येतलें. एफएल गोम्स मार्गार ‘अप रॅम्प’ बांदतले. जेणे करून शार वाठारांतल्या वाहनांक त्या ‘अप रॅम्प’ वयल्यान बायणा उड्डाण पुला वयल्यान वरुणापुरी मार्गान शारा भायर वचूंक मेळटलें. सद्या लोकसंख्या आनी वाहनांची संख्या वाडत आसा. ताका लागून साधनसुविधा वाडोवपाची गरज आशिल्ल्याचें आमदार साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
