भांगरभूंय | प्रतिनिधी
दर्यादेग वाठारांतल्यो दोंगुल्ल्यो पयलीं भशेन करच्यो: आलेमांव
मडगांव: वार्का पेड्डा दर्यादेगे लागसारच्यो रेंवेच्यो दोंगुल्ल्यो रस्तो करून नश्ट केल्यात. ह्यो दोंगुल्ल्यो पयलीं भशेन करतले अशें आमदारान आनी पंचायतीन सागिल्लें. पूण हातूंत कोणाचो तरी फायदो आशिल्ल्यान तें काम जालें ना. हाचें उरफाटें अजून लेगीत रेंव काडपाचें काम सुरू आसा असो दावो समाजीक कार्यकर्ते साविओ आलेमांव हांणी केला.
साविओ आलेमांव हांणी वार्कांतल्या थळाव्या तरणाट्यां सयत दर्यादेग वाठारांतली पळोवणी केली तेन्ना रेंव काडीत आशिल्ल्याचें दिसून आयलें. हाचें आदीं 22 ऑगस्ट दिसा गांवांतल्या लोकांनी रेंवेंच्यो दोंगुल्ल्यो नश्ट केल्ल्याचें उक्तें केल्लें. हांगा तीन मिटरा परस चड उंचायेच्यो रेंवेंच्यो दोंगुल्ल्यो आशिल्ल्यो. सुवार्था खातीर पर्यावरणाचो बळी दिवपाचो डाव कांय जाणांचो आसा अशें आलेमांव हांणी म्हणलें.
ग्रामसभेंतूय हो विशय काडून रेंवेंच्यो दोंगुल्ल्यो आशिल्ल्यो तश्यो परतून करपाची मागणी केल्ली. हें काम कोणे केलें हाची म्हायती कोणाक ना. आमदार आनी पंचायत मंडळूय हे सुवातेर पळोवणी करून गेले. पूण देड म्हयन्या परस चड काळ जावन लेगीत रेंवेंच्यो दोंगुल्ल्यो आशिल्ल्यो तश्यो परतून जाल्यो नात.
हाचे पयलीं 30 ऑगस्ट दिसा गोवा कोस्टल झोन मॅनेजमेंट अॅथोरिटी कडेन कागाळ केल्ली, ताची दखल घेतली ना. आतां परतून एकदां कागाळ नोंद केल्या आनी रेंव काडप आनी दोंगुल्ल्यो काडीत आशिल्ल्याचें सांगलां. गोंय हें पर्यटन राज्य आसा. वार्का जायत आशिल्ले व्हॉलिबॉल सर्तीक आमी येवकार दितात. पूण पर्यावरणाचें लुकसाण करून थळाव्यांचो कसलोच फायदो नासल्यार कोणाच्या तरी फायद्या खातीर जावपी विकास गांवांतल्या लोकांक नाका अशें आलेमांव हांणी सांगलें.
गोंय सरकारान गोंय कोस्टल अथोरिटीन हाची दखल घेवची आनी दोशींचेर कारवाय करची अशी मागणी आलेमांव हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
