भांगरभूंय | प्रतिनिधी
दिवचल, प्रतिनिधी :राज्यांत कॅन्सराचें वाडत वचपी प्रमाण नियंत्रणांत हाडपा खातीर थळाव्या पांवड्याचेर उपाय जावप गरजेचें. नेमान भलायकी तपासणी, जिणे शैलींत बदल घडोवपा वांगडा गांवगिर्या वाठारांत भलायके कडेन आडनदर करिनासतना काळजी घेवपाची गरज आसा. रोटरी आनी हेर संस्था भलायकी शिबिरां वरवीं नेमान जागृताय घडयता, अशें मुख्यमंत्री डॉ. प्रमोद सावंत हांणी सांगलें.
रोटरी क्लब ऑफ साखळे आनी हेल्थवे हांच्या जोड पालवान रवींद्र भवनांत भलायकी तपासणी शिबिराचें आयोजन केल्लें.
राज्य सरकार भलायके विशीं जागृत आसा, खुबश्यो आधुनीक वैजकी सुविधायो सगळे कडेन उपलब्ध केल्यात. सरकारून भलायकी सेवे वरवीं जनतेक आदार करता. हाचे कडेन गांवगिर्या वाठारांतल्यो बायलो आनी नागरीक आडनदर करता. तांणी नेमान तपासणी केल्यार खंयच्याय रोगांचेर वेळार नियंत्रण दवरूं येता. समाजीक संस्थांनी ही जापसालदारकी घेतिल्ल्याचें मुख्यमंत्र्यान सांगलें.
ह्या शिबिराचो लाव जायत्या दुयेतींनी घेतलो. विंगड विंगड दुयेंसांचेर डॉक्टरांच्या पंगडान तपासणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
