भांगरभूंय | प्रतिनिधी
म्हापशें, प्रतिनिधी ः वागातोरच्या जॉली रिसॉर्टांत जाल्ल्या अपघात प्रकरणांत दुबावीत सचिन वेणूगोपाल कुरुप (42, आसगांव) सोऱ्याचे नशेंत गाडी चलोवंक नाशिल्ल्याचें अल्कोहोल चांचणीत स्पश्ट जालां. ड्रग्सच्या चांचणेचो अहवाल अजून मेळूंक ना. ह्या अपघातांत हॉटेलाची मालकीण रेमेडिया रेमी अल्बुकर्क (57) हिका मरण आयिल्लें जाल्यार दोन कर्मचारी जखमी जाल्ले.
अपघाता उपरांत पुलिसांनी दुबाविताक ताब्यांत घेवन ताका म्हापशें जिल्लो हॉस्पिटलांत दाखल केलो. थंय ताची अल्कोहोल चांचणी केली. शुक्रारा सकाळीं हणजूणे पुलिसांक संबंदीत चांचणेचो अहवाल मेळ्ळो. हो अहवाल नकारात्मक आयलो. इतलेंच न्हय तर पुलिसांच्या फॉरेंसिक पंगडान दुबाविताची ड्रग्स चांचणी केली जाचो अहवाल आजून येवंक ना.
मजगतीं, 11 नोव्हेंबराक रातच्या सुमार 8.45 वरांचेर हो अपघात जाल्लो. दुबावीत सचिन कुरूप एचआर 13 जी 1831 च्या फोर्ड एन्डेव्हर गाडयेंतल्यान जॉली रिसॉर्टांत आयलो आनी गाडी व्हड वेगान रिसॉर्टाच्या रिसेप्शनाचेर हाजीर आशिल्ल्या तिगांचेर व्हरून मारली. हांतूत रिसॉर्टाची मालकीण रेमेडिया हिका जाग्यारुच मरण आयले जाल्यार शिव मंगल दिंडो (22) आनी रुपा परास (34) हे दोग कामगार जखमी जाले. अपघाताच्या वेळार रेमेडिया गिरायका कडेन फोनाचेर उलयताली आनी जखमी कामगार तिचे कुशीक उबे आशिल्ले. दुबावीत आरोपी ह्या रिसॉर्टांत आपले इश्टिणीक मेळपाक आयिल्लो.
अपघाता उपरांत पुलिसांनी गुन्यांव नोंद करून सचिन कुरूपाक अटक केली. सध्या म्हापश्यां न्यायालयाच्या आदेशा प्रमाण दुबाविताक कोलवाळ बंदखणीच्या न्यायालयीन ताब्यांत दवरला.
मजगतीं, दुबावीत सचिन कुरूपाचो ड्रायव्हिंग परवानो फाटल्या वर्सा ऑक्टोबर 2022 वर्सा सोंपलो आनी अपघाती गाडयेचो विमो ऑगस्ट 2023 वर्सा सोंपलो अशें पुलिसांच्या चवकशेंत दिसून आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
