वर्सभरयां बार्देशांतल्या अडेज हजार लोकांक रस्त्याद कुत्र्यांनी मारले घास दर्या देग वाठारांतल्या पर्यटन थळांचेर चड उपद्रव 

भांगरभूंय | प्रतिनिधी

भांगरभूंय । प्रतिनिधी
म्हापशेंः बार्देश तालुक्यांत रस्त्याद कुत्र्यांचो उपद्रव वाडपाक लागला. फाटल्या वर्स भरयां सुमार अडेज हजार लोकांक ह्या कुत्र्यांनी घास मारल्यात. म्हापश्यांतल्या उत्तर गोंय जिल्हो हॉस्पिटलांत हाची नोंद जाल्या,  रॅबीज जावन कोणूय मेल्ल्याची मात नोंद जाल्ली ना.
कांय वर्सां आदीं रॅबीज वासिनीकरण आनी कुत्र्यांच्या आंकड्याचेर नियंत्रण दवोरपाची मोहीम चालीक लायिल्ली. मात हालिसाराक व्हो आंकडो वाडपाक लागला. म्हापशे शारांत कुत्र्यांचो आंकडो वाडपाक लागला. रॅबीज वासिनीकरण करपा खातीर धरून हाडल्ल्या कुत्र्यांक वासिना दिवंन म्हापशें पालिका वाठारांत हाडून सोडतात असो दुबाव आदल्या पालिका मंडळान उक्तायल्लो. मात पालिकेन ते विशीं फुडें कसलीच कारवाय मात केली ना.
म्हापशें शारांत जंक्शन वा कोयराच्यो पेट्यो दवरतात त्या सुवातांनी रस्ताद कुत्रीं आसतात. रातभर ते भोकतात आनी ताका लागून लोकांक न्हिदपाक मेळना. कांय कुत्री वाहना फाटल्यान चड करून दुचाकीवाल्यांच्या फाटल्यान लागतात शाळकरी भुरग्यांक लेगीत तांचो त्रास जाता.
 बार्देश तालुक्यांतल्या नेरूल, सिकेरी, कांदोळी, कळंगुटे, बागा, हणजूणस वागातोर आनी शिवोली ह्या दर्यादेग वाठारांत रस्त्याद कुत्र्यांचो थळावे लोक आनी पर्यटकांक चड त्रास जाता. कळंगुटे आनी वझरांत वागातोर हांका पर्यटकांक कुत्र्यांनी घास मारपाचे प्रकार घडल्यात.
म्हापश्यांतल्या उत्तर गोंय जिल्हो हॉस्पिटलांत नोंदणे वयल्यान म्हयन्याक सरासरी 208 लोकांक कुत्रे घास मारतात. उपचार करून तांका घरा धाडटात. गोवा कॅन हे बिगर सरकारी संस्थेन तीन वर्सां आदी उत्तर गोंयच्या जिल्होधिकाऱ्याक निवेदन सादर करून रस्त्याद कुत्र्यांचे वाडटे संख्येर नियंत्रण दवोरपाची मागणी करून तांचे दहशतीचेर उपाय काडपाची मागणी केल्ली.
 गोरवां सांबाळ आनी पशू वैजीक सेवा खात्यान रस्त्याद कुंत्र्यांच्या नियंत्रणा विशीचे प्रस्ताव, कुत्र्यांनी घास मारचे न्हय हे खातीर करपाचे उपाय आनी गोंय लघु प्राणी बचाव वेवस्थापन येवजणेच्या प्रगतीचो अहवाल हाची शहानिशी सरकारी पांवड्यार जावपाक जाय. अशें केल्यार रस्ताद कुत्र्यांचे  समस्येचेर फावो तो उपाय येवपाक शकता अशें मत गोवा कॅनाच्या रोलंड मार्टिन्स हाणे उक्तायलां.