वरुणापुरी अपघात; तरणाट्याक मरण

भांगरभूंय | प्रतिनिधी

अपघाता उपरांत प्रशासन न्हिदेंतल्यान जागें

समस्येचो घेतलो नियाळ; जिल्होधिकारी, नौदळ अधिकाऱ्यां कडेन चर्चा

वास्को: वरुणापुरी मांगोरहील चौक हें अपघात प्रवण क्षेत्र आसून थंय एखाद्याचो बळी वचचे पयलीं उपाय येवजण करची अशी विनंती थळाव्यां कडल्यान सेगीत जाताली. पूण उपाय येवजण मात जालीच ना. आयतारा रातीं जाल्ल्या अपघातांत एका 30 वर्सां पिरायेच्या तरणाट्याचो मात गरजे भायर बळी गेलो. उपरांत न्हिदेंतल्यान जागें जाल्ल्या प्रासनान सोमारा दनपारां थंयचे समस्येचो नियाळ घेतलो.

थंयचे अपघात आडावपा खातीर ज्यो गजाली करूंक जाय त्यो सगल्यो करतले. आमकां निश्पाप लोकांचो बळी दिवपाचो ना. हाका लागून येता त्या म्हयनो भरांत थंयची सगली समस्या पयस जावन तौ चौक अपघातमुक्त करपाचे यत्न आसतले अशें वास्कोचे आमदार दाजी साळकार हांणी सांगलें.

मुरगांव बंदरांतल्यान आयतारा रातीं म्हाल घेवन सडा, बायणा उड्डाण पूल, वरुणापुरी चौकार सावन वचपी ट्रक (केए 63 2716) वरुणापुरी चौकांत पावलो. त्या वेळार ट्रक चालकान गतीन आनी निश्काळजीपणान ट्रक चलोवन ट्रका मुखार आशिल्ले एके दुचाकीक (जीए 06 आर 8173) नेटाचो धपको दिलो. हो धपको इतलो खर आशिल्लो की दुचाकी चालक दुचाकी वयल्यान उसळून ट्रकाच्या फाटल्या रोदांत पडलो. तो गंभीर जखमी जाल्ल्यान उपचारा खातीर ताका चिखली हॉस्पिटलांत व्हेलो. पूण दोतोरांनी ताका मरण आयिल्ल्याचें जाहीर केलें.

मरण आयिल्ल्या तरणाट्याचें नांव अरविंद पास्वान (30) अशें आसा, आनी तो मांगोरहीलच्या संरक्षण कॉलनींत रावतालो. ह्या प्रकरणांत ट्रक चालकां आड गुन्यांव नोंद केला.

ह्या अपघातांत एका निश्पाप तरणाट्याचो बळी गेल्ल्याचें समजतकूच थळाव्यां मदीं तिडकीचें ल्हार पातळ्ळें. अपघात थळार शेंकड्यांनी लोक एकठांय जाले. तांणी थंयची येरादारी बंद करपाची मागणी केली. पूण थंय पाविल्ले आमदार कृष्णा साळकार हांणी तांची समजूत काडली. साळकार हांणी मुख्यमंत्र्या कडेन संपर्क सादून तांकां म्हायती दिली. मुख्यमंत्र्यांनी जिल्होधिकारी आनी हेर यंत्रणांक ह्या प्रकरणांत लक्ष घालपाचे निर्देश दिल्ल्याचें साळकार हांणी थळाव्या लोकांक सांगलें बरोबर थंयचो तणाव निवळ्ळो.

सोमारा दनपारां आमदार साळकार हांचे सयत दक्षीण गोंयचे जिल्होधिकारी अश्वीन चंद्रू, मुरगांवचे उपजिल्होधिकारी भगवंत करमली, वास्कोचे पुलीस उपअधिक्षक सलीम शेख, येरादारी पुलीस निरिक्षक शैलेश नार्वेंकार, भारतीय नौदळाचे अधिकारी, राष्ट्रीय महामार्ग, भौशीक बांदकाम खात्याचे अधिकारी बी हाजीर आशिल्ले. थंय विवीध गजालींचेर चर्चा केली. वरुणापुरी चौका मुखार भारतीय नौदळान रस्त्याचे कुशीक सोबितीकरणाचें काम केलां. तें थंयच्यान काडपा संबंदी नोटिसी दिल्ल्यो. पूण तें बांदकाम अजून थंयच आसा. वरुणापुरी गेटी मुखार कोणूय वाहनां उबीं करीत आशिल्ल्यान थंय सोबितीकरणाचें काम केल्ल्याचें नौदळान स्पश्ट केलें. पूण तें काडून उडोवपाची तयारी तांणी दाखयली.

आमदार कृष्णा साळकार हांणी वरुणापुरु चौक अपघात मुक्त जावचो हे खातीर आराखडो तयार करतले अशें सांगलें. थंय वाहनांची गती उणी जावची हे खातीर रंबलर घालपाचो आदेश जिल्होधिकारी कचेरेंतल्यान जारी करतले. येरादारी कंत्राटदारांनी आपलो फक्त वेवसाय पळोवचो न्हय, लोकांचे जीव वचचे न्हय हे खातीर योग्य ती दक्षता घेवपाची गरज आशिल्ल्याचें साळकार हांणी स्पश्ट केलें.

ट्रकांतल्यान तांकी परस चड म्हालाची येरादारी करतात. ताका लागून वाहनांचे गतीचेर नियंत्रण दवरतना चालकांक त्रास जाता. हे खातीर तांकी परस चड म्हालाची येरादारी करपी ट्रकांचेर लक्ष दिवपा खातीर यंत्रणेची गरज आसा अशें साळकार हांणी म्हणलें.

उपअधिक्षक सलीम शेख हांणी सांगलें, भारतीय नौदळान आपले प्रवेश दार 100 मिटर फाटीं घेतल्यार रस्त्यारूच उबीं अशिल्लीं वाहनां थंय उबीं रावपाक मजत जातली. सोमारा केल्ले पळोवणोचो आनी चर्चेची फाटपुरवण करतले.