भांगरभूंय | प्रतिनिधी
भांगरभूंय । प्रतिनिधी
पणजीः संसदेच्या पावसाळी अधिवेशनांत केंद्र सरकारान गोंयांतल्या एसटी समाजाक विधानसभा मतदारसंघ राखीव दवोरपा खातीर विधेयक पास केलें ना जाल्यार लोकसभा वेंचणुकेचर बहिश्कार घालपाची तयारी आमी दवोरल्या अशें एसटी मिशन राजकी आरक्षण समितीचो सचीव रुपेश वेळीप हाणे सांगलां.
राज्यांतल्या एसटी समाजाक विधासभा मतदारसंघ आरक्षण मेळचें हे खातीर मिशन राजकी आरक्षण समिती संघर्श करता. ते खातीर समितीचे पदाधिकारी केंद्रीय मंत्र्यांच्यो भेटी घेवन मागणेची फाटपुरवण करता. आरक्षणा खातीर लोकसभा वेंचणुकेचेर बहिश्कार घालचें नात अशें युनायटेड ट्रायबल असोसिएशनाचो (उटा) अध्यक्ष आनी आदले मंत्री प्रकाश वेळीप हांणी जाहीर केल्लें. ते विशीं विचारलें तेन्ना उटा संघटनेत सध्या फकत धा जाणा आसा. एसटी समाजा कडेन तांची नाळ जोडिल्ली ना अशें रुपेश वेळीप हाणे सांगलें.
अनुसूचीत जातींत राजकी आरक्षण मेळचें हे खातीर राज्यांतल्यो 16 संघटना प्रामाणिकपणान यत्न करतात असो दावो रुपेश वेळीप हाणे केलो तरी उटा आनी तांचे मदी मतभेद आसात हें उक्ताडार आयलां. राजकी आरक्षणाचो हक्क आमी कसोय करून मेळयतले. आदिवासी कल्याण संसदीय समितीचो अध्यक्ष डॉ किरीण सोळंकी हांणे ससंदेच्या पावसाळी अधिवेशनात विधेयक समंत करपाची हमी आमकां दिल्या. ताका लागून ह्या अधिवेशनाची आमी वाट पळयतात. विधेयक पास केलें ना जाल्यार लोकसभा वेंचणुकेचेर आमी बहिश्कार घालतले अशें रुपेश वेळीपान ठामपणान सांगलें.
प्रकाश वेळीप हांचे कडेन फकत धा जाणाची उटा ही एकूच संघटना आसा. आमच्या फाटल्यान 16 संघटना आसात. राजकी आरक्षणाची मागणी आमी सरकारा कडल्यान मान्य करून घेतलेच अशें गोंय आदिवासी संघटनेचो अध्यक्ष जोसेफ वाझ हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
