भांगरभूंय | प्रतिनिधी
दोनूय जाग्यांचेर भाजपाचे जैत निश्चित : मुख्यमंत्री
पणजी, प्रतिनिधी : लोकसभा वेंचणुकेंत राज्यांत महाराष्ट्रवादी गोमंतक पक्षा सयत हेर सगल्या प्रादेशिक पक्षांचो तेंको घेवपाची भाजपाची तयारी आसा. लोकसभेचे दोनूय जागे भारतीय जनता पक्ष सहज जिखतलो, असो विस्वास मुख्यमंत्री डॉ. प्रमोद सावंत हांणी उक्तायलो.
भारतीय जनता पक्षाची घटक पक्षांच्या आमदारां सयत लोकसभा वेंचणुकीचे तयारे खातीर बुधवारा बसका जाली. हे बसकेक केंद्रीय म्हायती तंत्रज्ञान मंत्री राजीव चंद्रशेखर हांणी मार्गदर्शन केले. भाजपाचे मंत्री, आमदारां सयत मगोचे मंत्री सुदीन ढवळीकार आनी अपक्ष आमदार हाजीर आशिल्ले.
चंद्रशेखर हांणी मंत्री तशेच आमदारांक मार्गदर्शन केले. लोकसभा वेंचणुकेक फकत 160 दीस उरल्यात. गोंयांतल्या दोनूय जाग्यांचेर भाजपाकूच जैत मेळटलें. उमेदवारां विशी आजून निर्णय घेवंक ना. संसदीय मंडळ उमेदवारां विशी निर्णय घेतलें, अशें मुख्यमंत्री सावंत हांणी सांगलें.
2014 उपरांत प्रधानमंत्री नरेंद्र मोदी हांच्या फुडारपणा खालच्या भाजप सरकारान देशांत परिवर्तन करपाचो वावर केला. प्रधानमंत्री नरेंद्र मोदी हांच्या कार्याक लागून गोंयकार भाव- भयणी भाजपा सोडून आनीक कोणाकूच मतदान करच्यो नात. देखून गोंयांत भाजपाचे जैत निश्चित आसा, असो विस्वास चंद्रशेखर हांणी उक्तायलो.
पत्रकार परिशदेक केंद्रीय मंत्री श्रीपाद नायक, प्रदेश अध्यक्ष, खासदार सदानंद शेट तानावडे हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
