भांगरभूंय | प्रतिनिधी
मुंबय उच्च न्यायालयाचें मत
मुंबय, खबरां संस्था: लग्न जाल्ले बायलेन परकी दादल्या कडेन संमतीन शारिरीक संबंद दवरल्यार ताका बलात्कार म्हणूंक जायना अशें उच्च न्यायालयान मत मांडलें. इतलेंच न्हय तर बायलेन आपल्या इश्टा आड दाखल केल्ले बलात्कार प्रकरणूय न्यायालयान रद्द केलें. मुंबय उच्च न्यायालयान याचिकेचेर ही सुटका दिली.
कागाळदार बायलेची वळख २०२० वर्सा याचिकादार दादल्या कडेन जाल्ली. दोगांय लग्न जाल्यांत आनी तांकां दरेकीं २ भुरगीं आसात. वळख जाल्या उपरांत दोगांय मदीं मोग जालो. तीं दोगांय एकामेकाच्या मोगांत इतलीं बुडलीं की तांचे मदीं जायते फावट शारिरीक संबंद निर्माण जाले.
मजगतीं, ते बायलेच्या घोवाक आनी त्या दादल्याचे बायलेक ह्या दोगांयच्या मोगाच्या संबंदा विशीं कळ्ळें. २०२१ त बायलेच्या घरांत शारिरीक संबंध दवरतना तिच्या घोवान पळयलें. उपरांत ते बायलेच्या घोवान तिका घरांतल्यान भायर काडली.
‘आतां तूं आपल्या कडेन लग्न कर.’ अशें ते बायलेन आपल्या मोग्याक सांगलें. पूण तांणी ‘आपूण पयलींच लग्न जालां. तुजे कडेन लग्न जावपाक शकना.’ अशें म्हणीत न्हयकार दिलो.
मजगतीं, ते बायलेन आपल्या मोग्या आड पुलिशेंत कागाळ दाखल केली. लग्नाचें वचन दिवन आपल्या बळजबर्यां आपल्या कडेन शरिरीक संबंद दवरले, असो आरोप बायलेन केलो.
हाचे उपरांत पुलिसांनी बायलेच्या इश्टा आड केस नोंद केली. उपरांत मोगी सरळ न्यायालयांत गेलो. तांणी न्यायालयांत याचिका दाखल करून आमी दोगांय लग्न जाल्यांत आनी संमतीनूच संभोग केला अशें सांगलें. हे याचिकेचेर कोर्टान सुनावणी घेतना दोनूय वटांचो युक्तीवाद आयकून घेतलो.
बायल लग्न जाल्ली आसली तरी तिचो परकी दादल्याकडेन शारिरीक संबंद आशिल्लो. तिचो मोगीय लग्न जाल्लो हें तिका खबर आशिल्लें. देखून ह्या कृत्याक बलात्कार म्हणूंक जायना. अशेंं निरीक्षण नोंद करून कोर्टान बायलेच्या मोग्या आड दाखल केल्लो गुन्यांव फाटीं घेवपाचे आदेश दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
