शिवोली आनी साळगांवच्या भाजप कार्यकर्त्यांची मनधरणी

भांगरभूंय | प्रतिनिधी

कार्यकर्त्यांचो एकसंघ रावन पक्ष कार्य करपाचो निर्धार

म्हापशें ः काँग्रेसीच्या आठ आमदारांचो गट भाजपांत विलीन जाला. ताका लागून भाजप फुडारी आनी पोरणे कार्यकर्ते दुखावल्यात. ह्या फुडाऱ्यांची आनी कार्यकर्त्यांची मनधरणी करपाचें सत्र मुख्यमंत्री डाॅ. प्रमोद सावंत आनी प्रदेशाध्यक्ष सदानंद शेट तानावडे हांणी चलयलां. शुक्रारा सांजवेळा म्हापशेंच्या पक्ष कार्यालयांत शिवोली आनी साळगांव मतदारसंघांतल्या कार्यकर्त्यां वांगडा तांणी बसका घेतली.
बसके वेळार दोनूय मतदारसंघांतल्या कार्यकर्त्यांनी आठ आमदारांक पक्षांत घेतिल्ले खातीर जाहीरपणान नाराजी उक्तायली. पक्षाचें हें वागणें अयोग्य आनी चुकीचें आसा अशी खंत तांणी मुख्यमंत्री आनी प्रदेशाध्यक्षां मुखार परगटायली.
हो निर्णय केंद्रान घेतला. आमकां हे घडामोडी विशीं म्हायती नासली. आतां पक्षश्रेश्ठींनी निर्णय घेतला. आमी सगल्यांनी एकत्रितपणान पक्षा खातीर काम करूंक जाय अशी मनधरणी करून मुख्यमंत्री, प्रदेशाध्यक्ष आनी हेर फुडाऱ्यांनी ह्या कार्यकर्त्यांची समजून काडपाचो यत्न केलो.
चालू राजकी घडामोडी विशीं साळगांव आनी शिवोली मतदारसंघांतल्या पोरण्या कार्यकर्त्यांक म्हायती दिवपा खातीर ही बसका घेतिल्ली. ह्या कार्यकर्त्यांक सगली कल्पना दिल्या. सगले कार्यकर्ते एकसंघ आसात. तांकां कसलीच हरकत ना. ते पक्षा खातीर काम करतले अशें मुख्यमंत्री डाॅ. प्रमोद सावंत हांणी सांगलें.
अशा राजकी घडामोडीं उपरांत कार्यकर्तो ल्हानशी नाराजी उक्तायताच. ते सभावीक आसा. ही पक्षाच्या पोरण्या कार्यकर्त्यां वांगडा बसका आसली. हे फुडें नवे आमदार आनी पोरण्या कार्यकर्त्यांची जोड बसका जातली अशें मुख्यमंत्र्यांनी स्पश्ट केलें.
येता ते लोकसभेंत उत्तर आनी दक्षीण गोंयांत भाजपाचेच उमेदवार जिखतले. दोनूय सुवातांनी फाटल्या परस चड मतांनी आनी टक्केवारी घेवन भाजपाचो बावटो हुबतलो असो दावो तांणी केलो.
ह्यो राजकी घडामोडी आमच्या कार्यकर्त्यां खातीर नव्यो न्हय. 2017 वर्सा अशी घडणूक घडिल्ली. इतलें आसुनूय तो फुडारी 10 हजार मतां वयल्यान फकत 402 मतांचेर पावलो. ताका लागून हीच पुनरावृत्ती येता त्या काळांतूय पळोवंक मेळूंक शकता. सध्या मुख्यमंत्री आनी भजपाक पक्ष चलोवंक जाय. आमी कित्याक फाटीं रावुया. हांव पक्षाचो प्रामाणीक कार्यकर्तो आसा. सोयी प्रमाण माकडउडयो मारपी आमी न्हय अशें बसके उपरांत आदले मंत्री दयानंद मांद्रेंकार हांणी सांगलें.
चालू राजकी घडामोडींक लागून आमच्या मनांत कसलेच हेवेदावे वा नाराजी ना. हांव पक्षाचो कार्यकर्तो. पक्षा खातीर सगल्यां वांगडा एकत्रितपणान काम करीत रावतलों. येता ते लोकसभा वेंचणुकेंत नव्या आमदारां वांगडा काम करून पक्षाक जैतवंत करतलों अशें आदले मंत्री जयेश साळगांवकार हांणी सांगलें.