राज्यांत तिसरो जिल्हो जातलो? तिसऱ्या जिल्ह्याच्या अभ्यासा खातीर समिती

भांगरभूंय | प्रतिनिधी

सरकाराक 3 म्हयन्यांत अहवाल जातलो सादर

पणजी : राज्यांत तिसऱ्या जिल्हाच्या अभ्यासा खातीर सरकारान 6 वांंगड्यांंची समिती स्थापन केल्या. अभ्यास समिती स्थापन जाल्ल्यान तिसरो जिल्हो स्थापन जावपाची शक्यता आसा. फाटल्या विधानसभा कार्यकाळांत तिसऱ्या जिल्ह्याच्या मागणी विशींच्या खासगी थारावाचेर चर्चा लेगीत जाल्ली. ही समिती 3 म्हयन्यांत सरकाराक अहवाल सादर करतली.

गोंंयांंत उत्तर गोंंय आनी दक्षीण गोंंय अशें दोन जिल्हे आसात. अदीं मदीं फोंंडें हो तिसरो जिल्हो जावचो अशी मागणी जाता. हे मागणे विशीं सरकारान कसल्योच हालचाली मात करूंंक नाशिल्ल्यो. आतां मात तिसऱ्या जिल्ह्याच्या अभ्यासा खातीर मुखेल सचिवांच्या फुडारपणा खाला समिती स्थापन केल्या. समितीची अधिसुचोवणी नियोजन आनी सांंख्यिकी खात्यान जारी केल्या.

ही समिती अशी आसा : मुखेल सचीव (अध्यक्ष), वांंगडी : अर्थ सचीव, रहिवासी आयुक्त, येणावळ सचीव, जिल्होधिकारी (दक्षीण/उत्तर), चारूदत्त पाणीग्रही (मुख्यमंंत्र्यांचे सल्लागार), वांंगडी सचीव : नियोजन आनी सांंख्यिकी खात्याचे संचालक.

खर्च आनी लावाचो अदमास

तिसरो जिल्हो स्थापन जालो जाल्यार खर्च कितलो येतलो. तशेंच लाव कितल्या लोकांंक आनी कितल्या प्रमाणांत जातलो, हाचो अभ्यास करून समिती अदमास उक्तायतली. राज्यांत मागास म्हाल आसात. ह्या मागास म्हालांंक तिसऱ्या जिल्ह्याचो लाव जातलो काय? हे विशीं समिती सुचोवणी दितली.

जिल्ह्याच्या शिमांं विशीं समिती सुचोवणी करतली

विधानसभेंत बऱ्याच वर्सां पयलीं फोंंडें हो तिसरो जिल्हो करपाचेर चर्चा जाल्या. सरकारान जी समिती स्थापन केल्या तातूंत फोंंडें नांवाचो उल्लेख ना. तिसऱ्या जिल्ह्यांत कितले म्हाल आसतले, लोकसंंख्या कितली आसतली, पंचायती कितल्यो आसतल्यो, हे विशींच्यो सुचोवण्यो समिती दितली. जिल्ह्याच्या शिमांं विशीं सुचोवणी दिवपाचे अधिकार समितीक आसा.

तिसऱ्या जिल्ह्या विशीं जनमत तशेंच मुळाव्या सुविधांंचो विचार समितीक करचो पडटलो.

सध्या सरकारांत मंंत्री आशिल्ले रवी नायक हे काँग्रेस पक्षांत आसतना तांंणी विधानसभेंत खासगी थाराव मांंडिल्लो. ह्या थारावाचेर बरीच चर्चा जाली. तिसरो जिल्हो स्थापन करपाचेर सरकार अभ्यास करतलें, अशें आस्वासन तेन्नाचे मुख्यमंंत्री मनोहर पर्रीकार हांंणी दिल्लें. ह्या आस्वासना उपरांंत तांंणी थाराव फाटीं घेतलो. ह्या थारावाक बरीच वर्सां जावन गेलीं. रवी नायक हे आतां सरकारात मंंत्री आसात. आतां सरकारान अभ्यासा खातीर समिती स्थापन केल्या. फोंंडें म्हालांत सगल्यांत चड मंंत्री आसात. वीज मंंत्री सुदिन ढवळीकार, खेळा मंंत्री गोविंंद गावडे तशेंच उदका पुरवण मंंत्री सुभाष शिरोडकार हांंचे मतदारसंंघ फोंंडें म्हालांत आसात. उत्तर गोंंयां परस लोकसंंख्या आनी क्षेत्रफळान दक्षीण गोंंय जिल्हो व्हड आसा.