भांगरभूंय | प्रतिनिधी
म्हापश्यां पत्रकार परिशदेंत ज्योशुआ डिसोझा हांची म्हायती
म्हापशें: पावस सुरू जाल्ल्यान रस्त्यांच्या डांबरीकरणाचें काम हातांत घेवप शक्य ना. मुखेल जंक्शन वा सामक्या गरज आशिल्ल्या रस्त्यांचीच आधुनीक तंत्रज्ञाना वरवीं दुरुस्ती करतले. पावसा उपरांत आनी भुंयगत वीज वाहिन्यांचें काम पुराय जाले उपरांत म्हापशेंच्या रस्त्यांचे हॉटमिक्सींग जातलें अशी म्हायती उपसभापती ज्योशुआ डिसोझा हांणी दिली.
बुधवारा म्हापश्यां भाजप कचेरेंत मोदी सरकाराक णव वर्सांच्या कार्यकाळ पुराय जाल्ले खातीर आयोजीत केल्ले पत्रकार परिशदेंत ते उलयताले. ह्या वेळार म्हापशें भाजप मंडळ अध्यक्ष नगरसेवक सुशांत हरमलकार, सरचिटणीस यशवंत गवंडळकार, योगेश खेडेकार आनी उपाध्यक्ष हनुमंत वारंग हाजीर आशिल्ले.
हाचे पयलीं उपसभापती ज्योशुआ डिसोझा हांणी म्हापशेंच्या भुंयगत वीज वाहिन्यां खातीर खणिल्ले चडशे रस्ते पावसा पयलीं, पयलीं भशेन वा दुरुस्त करतले अशें आस्वासन दिल्लें.
वीज वाहिन्यांचें काम येता त्या नोव्हेंबरांत पुराय जातलें. उपरांत लोकांक सुरळीत आनी अखंडीत वीज पुरवण जातली. भुंयगत वीज वाहिन्यां मदीं उच्च दाबीत 60 किलोमिटर जाल्यार उण्या दाबीत एलटी वाहिनींचें काम 90 किलोमिटर अंतराचें आसा अशें डिसोझान सांगलें.
भुंयगत वीज वाहिन्यांचें काम पुराय जावंक नाशिल्ल्यान आनी तांत्रीक कारणाक लागून रस्त्यांचें हॉटमिक्सींग आनी दुरुस्ती वेळांत पुराय करूंक मेळ्ळी ना. तशेंच वीज खात्याची सुचोवणी मेळूंक नाशिल्ल्यान भौशीक बांदकाम खात्या कडल्यान हें काम हातांत घेतिल्लें ना. पूण आवश्यक सुवातांनी सेलिंगाचें काम कंत्राटदारा वतीन करतले अशें सांगून डांबरीकरणाचें काम अजुनूय उरिल्ल्याची कबुली डिसोझान दिली.
मजगतीं, प्रधानमंत्री नरेंद्र मोदी सरकारान देशांतल्या विकास कामांक गती दिल्या. भारत सगल्यांत गतीन वाडपी अर्थवेवस्था आसा. मोदीक लागून देशाक संवसाराच्या नकाशाचेर वेगळी वळख आनी मानसन्मान मेळ्ळा. फाटल्या 9 वर्सांच्या कार्यकाळाचो विचार करीत जाल्यार येता ते लोकसभा वेंचणुकेंत लोकांची पसंती ह्याच सरकाराक आसतली असो आत्मविस्वास उपसभापती ज्योशुआ डिसोझान उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
