रणनिती प्रमाण थारतले उमेदवार

भांगरभूंय | प्रतिनिधी

-काँग्रेसीचो उमेदवारांच्या हालचालींक नेट

फाल्यां दोनूय उमेदवारांची घोशणा जावये

पणजी: भाजपाचे दोनूय उमेदवार जाहीर जाल्ल्यान उमेदवार निवडी खातीर काँग्रेसीच्या रणनितीक नेट आयलांं. दक्षिणेंत भाजपान महिलेक उमेदवारी दिल्ल्यान हिंंदू व्यक्तीक उमेदवारी दिवची वा ख्रिश्चन उमेदवाराक, हे विशीं रणनिती सुरू आसा. काँग्रेस छाननी समितीची बसका दिल्लींत फाल्यां 27 तारखेक जातली. हे बसकेंत उमेदवारांच्या नांवाची घोशणा जावपाची शक्यताय आसा.

प्रदेश काँग्रेस अध्यक्ष अमीत पाटकार आनी विरोधी पक्ष फुडारी युरी आलेमांव हे बसके खातीर दिल्लींत वतले. उत्तर गोंया खातीर दोन नांवांंचो विचार सुरू आसा. आदले केंंद्रीय मंंत्री अॅड. रमाकांंत खलप आनी विजय भिके हांंचें मदीं उमेदवारी खातीर सर्त आसा. दक्षीण गोंयांंत आतां मेरेन चार नांवां चर्चेत आसात. प्रदेश अध्यक्ष अमीत पाटकार, गिरीश चोडणकार, सध्याचे खासदार फ्रान्सीस सार्दीन आनी विरियातो फर्नांंडीस हांंच्या नांवांची चर्चा सुरू आसा. उत्तर गोंया परस दक्षीण गोंयच्या उमेदवारी विशीं तिढो आसा. गोवा फॉरवर्ड हो इंंडिया आघाडीचो घटक पक्ष आसलो तरी तांंणी सार्दिनाच्या उमेदवारीक विरोध केला. दक्षिणेंत क्रिस्तावांंचीं मतांं निर्णायक आशिल्ल्यान हिंंदू व्यक्तीक उमेदवारी दिवप वा ख्रिश्चन उमेदवाराक हे विशीं पेंच आसा.

भाजपान दक्षिणेची उमेदवारी कॅडरा भायल्या महिलेक दिल्ल्यान आमचे काम बरेच सोंपे जालांं. दक्षिणेंत काँग्रेसीचें जैत निश्चीत आसा. उमेदवारी विशीं विचार सुरू आसा. छाननी समितीचे बसकेंत निमाणो निर्णय जातलो, अशें प्रदेश अध्यक्ष अमीत पाटकार हांंणी सांंगलें.

हिंदू उमेदवार दिल्यार क्रिस्तावांचीं परंपरीक मतां पडत काय? असो प्रस्न पक्षा मुखार निर्माण जाला.

उमेदवारां विशीं निर्णय घेवपा खातीर काँग्रेसीचीं आतां दिल्लींत 27 मार्चाक बसका जातली. काँग्रेसीन दक्षीण गोंयांत क्रिस्तावांकूच उमेदवारी दिल्या. हाका लागून क्रिस्तांव उमेदवार वेंचून आयला. राजकारण बदलत आसता. दक्षीण गोंयांत हेर पक्षांचे हिंदू उमेदवार लेगीत वेंचून आयल्यात. काळा प्रमाण बदल हो करपाक जाय, अशें हे विशीं उलयताना प्रदेश अध्यक्ष अमीत पाटकार हांणी सांगलें. गोंयांत जातीं तशेंच धर्मा मदीं एकचार आसा. काँग्रेस हो सगल्या जातीं, धर्माक एकठांय घेवन वचपी पक्ष आसा. सगल्या लोकांक न्याय दिवपाचे नदरेंतल्यान उमेदवारांची निवड जातली, अशें अमीत पाटकार हांणी सांगलें. दक्षीण गोंयचो उमेदवार हिंदू वा क्रिस्तांव आसतलो, हे विशीं मात तांणी उलोवंक ना.

क्रिस्तांव मतदार हो काँग्रेसीचो परंपरीक मतदार. क्रिस्तांव मतदार काँग्रेसी फाटल्यान राविल्ल्यान दक्षीण गोंयांत सेगीत काँग्रेसीक येस मेळ्ळा. लोकसभा वेंचणुकेच्या इतिहासाचो विचार केलो जाल्यार दक्षीण गोंयांत चडशें खेपे क्रिस्तांव उमेदवार वेंचून आयला. जे हिंदू उमेदवार वेंचून आयल्यात ते मगो आनी भाजपाचे आशिल्ले.

एदुआर्द फालेरो, फ्रान्सिस सार्दिन, चर्चील आलेमांंव हे क्रिस्तांव उमेदवार काँग्रेसीच्या उमेदवारीचेर वेंचून आयल्यात. 1977 उपरांंत काँग्रेसीन केन्नाच हिंंदू व्यक्तीक उमेदवारी दिवंंक ना.