भांगरभूंय | प्रतिनिधी
‘यूएमटीसी’च्या अहवालाची जातली अंमलबजावणी
पणजी: अर्बन मास ट्रान्झीट कंपनीन (यूएमटीसी) सादर केल्ल्या अहवालाच्या आदारान फुडल्या पांच वर्सांत राजधानी पणजे सयत पुराय गोंयांतली येरादारी, पार्कींग हांचे वेवस्थेंत मोटे बदल घडोवन हाडपाचो निश्चेव मुख्यमंत्री डॉ. प्रमोद सावंत हांणी शुक्रारा विवीध खात्यांच्या अधिकाऱ्यां बरोबर घेतिल्ले बसकेंत केलाे.
स्मार्ट सिटी पणजी आनी गोंयांतल्या विवीध वाठारांनी पर्यावरणपुरक येरादारी वेवस्था, बस स्टॅण्ड वाठारांत पार्कींग, दर्जेदार बस स्टॅण्ड तशेंच बशी, फेरीबोटीचो चडांत चड वापरा विशीं ‘यूएमटीसी’न गोंय सरकाराक अहवाल सादर केला. ह्या अहवालाची फुडल्या पांच वर्सांनी टप्प्याटप्प्यान अंमलबजावणी करून येरादारी, पार्कींग हांचे वेवस्थेंत बदल घडोवन हाडपाचें मुख्यमंत्र्यांनी थारायलां.
ते खातीर येरादारी, न्हंय येरादारी, कॅप्टन ऑफ पोर्ट, कदंब म्हामंडळ बी हांणी ह्या अहवालाचो अभ्यास करून अहवाल सादर करपाचे निर्देशूय मुख्यमंत्र्यांनी दिल्यात. ह्या तिनूय खात्यांचे सचीव, संचालका सयत मुखेल सचीव आनी पुलीस खात्याचे अधिकारी लेगीत बसकेक हाजीर आशिल्ले.
कदंब बशींनी वाड करपाची शिफारस
गोंयांतली येरादारीची कोंयडी उणी करपा खातीर 11 मार्गा वयल्या कदंब बशींनी तशेंच आनीक 228 बशी सेवेंत हाडपाची शिफारस ‘यूएसटीसी’न कदंब म्हामंडळाक केल्या. तशेंच प्रवाशां खातीर दरेक बस स्टॅण्डार सुसज्ज पार्कींग वेवस्था, दर्जेदार स्टॅण्डूय उबारपाचो सल्लो दिला अशी म्हायती बसकेक हाजीर आशिल्ल्या एका अधिकाऱ्यान ‘भांगरभूंय’ कडेन उलयतना दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
