भांगरभूंय | प्रतिनिधी
रोलंड मार्टिन्स: झेब्रा क्रॉसींग पालिकांनी, पंचायतींनी रंगोवचें
वास्को: येरादारी वेवस्थापन ही फक्त येरादारी पुलीस आनी येरादारी खातें हांची जापसालदारकी नासून ती दरेकाची जापसालदारकी आसा. ताका लागून दरेकान येरादारी नेमांक पाळो दिवपाची गरज आशिल्ल्याचें गोवा कॅनाचे समन्वयक रोलंड मार्टिन्स हांणी सांगलें. झेब्रा क्रॉसींग रंगोवपाचें काम भौशीक बांदकाम खात्यान करपा बदला ते पालिका, पंचायतीन करचें असो विचार तांणी मांडलो.
यू एन संवसारीक येरादारी सप्तका निमतान गोवा कॅन आनी वास्को येरादारी पुलीस हांणी जोड रितीन वाहन चालक, चलून वचप्यां मदीं जागृताय निर्माण करपा खातीर एके कार्यावळीचें आयोजन केल्लें. झेब्रा क्रॉसिंगा वयल्यान चलून वचप्यांनी रस्तो हुपचो. पूण हांगा लोक खंयच्यानूय आनी कशेय रस्तो हुपत आशिल्ल्याचें दिसून येता. तांचे मदीं जागृताय निर्माण केली.
तशेंच चलून वचपी लोक झेब्रा क्रॉसींगे वयल्यान वतना वाहन चालकांनी तांकां मान दिवन तांकां रस्तो हुपपा खातीर प्राधान्य दिवपाची गरज आसा अशें रोलंड मार्टिन्स हांणी म्हणलें.
हॅल्मेट घाले उपरांत ताचो बेल्ट बांदपाचे कांय जाण टाळटात. मोटारींत चालक आनी फुडल्या सिटार बसपी बेल्ट लावपाची गरज आसा अशें तांणी म्हणलें.
येरादारी वेवस्थापनांत समाजांतल्या विवीध मळा वयल्या लोकांनी, समाजीक संस्थांनी वांटेकार जावपाची गरज आसा. गोंयांतल्या सगल्या पंचायती आनी पालिका वाठारांत रस्तो सुरक्षा समित्यो स्थापन करतले. जेणे करून पंच, नगरसेवक, नगरसेविका हांकां रस्तो सुरक्षा जागृताय कार्यावळींत आस्पाव घेवंक मेळटलें अशें मार्टिन्स हांणी सांगलें. अपघाती मृत्यू दर उणो जावचो हे खातीर दरेकान आपले परीन यत्न करचें अशेंय आवाहन तांणी केलें.
वास्को येरादारी पुलीस विभागाचे निरिक्षक शैलेश नार्वेंकार हांणी लेगीत दरेकान वाहना विशींच्या नेमांक पाळो दिवपाची गरज आशिल्ल्याचें सांगलें. झेब्रा क्रॉसिंगा वयल्यान चलून वचप्यांनी रस्तो हुपचो. येरादारी नेमा संबंदी जागृताय जावची हे खातीर म्हाविद्यालय, उच्च माध्यमीक विद्यालयांतल्या विद्यार्थ्यांक विवीध कार्यावळींनी आस्पावन घेतले अशेंय नार्वेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
