येता ते विधानसभा वेंचणुकेंत एसटी आरक्षण

भांगरभूंय | प्रतिनिधी

शिश्टमंडळान घेतली केंद्रीय गृह मंत्र्यांची भेट

पणजी: येता ते विधानसभा वेंचणुकेंत एसटीक आरक्षण मेळपा खातीर सोपस्कार फास्ट ट्रॅक करून पुराय सहकार्य करपाचें आस्वासन केंद्रीय गृह मंत्री अमीत शाह हांणी दिलां. मुख्यमंत्री डॉ. प्रमोद सावंत हांणी ही म्हायती दिली. मुख्यमंत्री डॉ. प्रमोद सावंत हांच्या फुडारपणा खाला शिश्टमंडळान केंद्रीय गृह मंत्र्यांची दिल्लींत भेट घेतली.

केंद्रीय मंत्री श्रीपाद नायक, प्रदेश भाजप अध्यक्ष दामू नायक, सभापती गणेश गांवकार, आदिवासी कल्याण खात्याचे मंत्री रमेश तवडकार, आमदार गोविंद गावडे हांचो शिश्टमंडळांत आस्पाव आशिल्लो. केंद्रीय गृह मंत्री अमीत शाह हांणी शिश्टमंडळाचें म्हणणें आयकून घेतलें. येता ते वेंचणुकेंत एसटीक आरक्षण मेळचें, म्हूण आवश्यक ते सोपस्कार रोखडेंच पुराय करतलों, अशें तांणी सांगिल्ल्याची म्हायती आमदार गोविंद गावडे हांणी दिली.

गोंय विधानसभेंत अनुसुचीत जमातींक (एसटी) आरक्षण मेळचें अशी अनुसुचीत जमातीची मागणी आशिल्ली. हे खातीर गोंय विधानसभा अनुसुचीत जमाती आरक्षण विधेयक तयार जावन ते संमत जालें. फाटल्या वर्सा संसदेंत हें विधेयक संमत जालें. राष्ट्रपतींनी मान्यताय दिल्ल्यान ह्या विधेयकाचें कायद्यांत रुपांतर जालां. केंद्र सरकारान अधिसुचोवणी जारी करूंक नाशिल्ल्या कारणान केंद्रीय वेंचणूक आयोगान अजून मेरेन मतदारसंघ आरक्षीत करपाची प्रक्रिया सुरू करूंक ना. अधिसुचोवणी जारी जाले उपरांत लोकसंख्ये प्रमाण एसटीं खातीर मतदारसंघ आरक्षीत जातलें.

येता ते विधानसभा वेंचणुकेंत एसटी आरक्षण लागू जावचें म्हूण फाटल्या म्हयन्यांत मिशन पॉलिटीकल रिझर्व्हेशनान धरणें आंदोलन सुरू केल्ले. अॅड. गोविंद शिरोडकार हांच्या फुडारपणा खाला तांणी हें आंदोलन सुरू केल्लें. आदिवासी कल्याण खात्याचे मंत्री रमेश तवडकार तशेंच मुख्यमंत्री डॉ. प्रमोद सावंत हांची भेट घेवन तांणी निवेदन सादर केलें. कार्यवाहेचे आस्वासन मुख्यमंत्र्यांनी दिले उपरांत तांणी धरणें आंदोलन फाटीं घेतलें. हाचे उपरांत मुख्यमंत्री डॉ. प्रमोद सावंत हांणी दिल्लींत प्रधानमंत्री नरेंद्र मोदी तशेंच गृह मंत्री अमीत शाह हांची भेट घेतली. आरक्षणाच्या कार्यवाहे विशीं चर्चा सुरू आशिल्ल्याचें तांणी सांंगलें.

इतले मजगतीं, सभापती गणेश गांवकार, आमदार गोविंद गावडे, आदिवासी कल्याण खात्याचे मंत्री रमेश तवडकार, आदले मंत्री प्रकाश वेळीप, आदले आमदार वासुदेव मेंग गांवकार हांणी प्रदेश भाजप अध्यक्ष दामू नायक हांची भेट घेवन एसटी आरक्षणाच्या कार्यवाहेची मागणी केली. हाचे उपरांत एसटी फुडाऱ्यांनी मुख्यमंत्री डॉ. प्रमोद सावंत हांची भेट घेवन आरक्षणाच्या कार्यवाहे खातीर पावलां उखलपाची मागणी केली. हाचे उपरांत केंद्रीय गृह मंत्री अमीत शाह हांची भेट घेवपाचो निर्णय जालो. एसटी आरक्षणा विशीं शिश्टमंडळाची आयतारा केंद्रीय गृहमंत्र्यां कडेन भेट जाली.

गोंय विधानसभेचो कार्यकाळ येता त्या 2027 वर्सां सोंपता. जनगणनेची प्रक्रिया सुरू जाल्ली आसली तरी विधानसभा वेंचणुके पयलीं ती जावप कठीण आसा. घरांच्या जनगणनेचो पयलो पांवडो पुराय जाला. फुडल्या वर्सा जनगणनेचो दुसरो पांवडो जातलो. विधानसभा वेंचणुके पयली जनगणना पुराय जावची नाशिल्ल्यान आरक्षण 2011च्या जनगणने प्रमाण लागू करचे पडटले. हे विशींची अधिसुचोवणी जारी करची पडटली. काणकोण, केपें, प्रियोळ, नुवें, सांगें ह्या मतदारसंघांत एसटीचें प्रमाण चड आसा. हाका लागून ह्या पांच मतदारसंघा पैकीं 4 मतदारसंघ एसटी खातीर आरक्षीत जातले. खंयचे मतदारसंघ आरक्षीत जातले, ते आजून मेरेन स्पश्ट जावंक ना. एसटी खातीर खंयचे मतदारसंघ आरक्षीत जातले, ताचो निर्णय सरकार घेवचो ना, वेंचणूक आयोग घेतलो, अशें मुख्यमंत्री डॉ. प्रमोद हांणी सांगलां.

एसटी आरक्षणा उपरांत मतदारसंघ तशेंच राजकी समीकरणां बदलतलीं. हाका लागून कांय समाजांचो तशेंच मतदारसंघाचो आरक्षणाक विरोध आसा. जनगणना जाले उपरांत आरक्षण लागू जावचें, अशी तांची मागणी आसा. तरी लेगीत येता ते वेंचणुकेंत आरक्षण लागू जावचें म्हूण सरकारान येत्न सुरू केल्यात.

गोंय विधानसभेंत सध्या अनुसुचीत जाती खातीर (एससी) एक पेडणें मतदारसंघ आरक्षीत आसा. आतां एसटी खातीर 4 मतदारसंघ आरक्षीत जावपाचे वाटेर आसात. आरक्षणाची कार्यवाही जाली ना जाल्यार परतून धरणें आंदोलन सुरू करपाची शिटकावणी मिशन पॉलिटीकल रिझर्व्हेशनान दिल्या.